იუსტიციის უმაღლესი საბჭოს მდივანი ლევან მურუსიძე არასამტავრობო ორგანიზაციების პოზიციას, უკანასკნელი დღეების მანძილზე, ისტერიკას უწოდებს. ამ შეფასებით, მურუსიძე სასამართლოს კრიტიკისთვის სანქციების შესაძლო დაწესებაზე იუსტიციის უმაღლესი საბჭოს წევრების განცხადებებს გამოეხმაურა:

„რატომ ვლაპარაკობთ სანქციებზე მაინცდამაინც, შეიძლება სხვა პოზიცია მქონდეს, ჩემს კოლეგას სხვა, ამიტომ გთავაზობთ დიდ მრგვალ მაგიდას რომ შევხვდეთ და ვისაუბროთ. ყველაზე დიდი პრობლემა არის ის, რომ პოლიტიკოსებისგან ხდებოდა მოსამართლეების ლანძღვა-გინება, ასევე ხდებოდა ისეთი პირებისგან რომლებსაც რაღაც ავტორიტეტი აქვთ. მე მინდა, რომ გვქონდეს ფართო შეხვედრა და მივიღოთ გადაწყვეტილება.

თუ ადამიანები გამოდიან და, ვთქვათ, ჟურნალისტებს ყოველდღე გარეწარს, სულგაყიდულს გიწოდებენ და უკიდურესი სიტყვებით გაყენებენ შეურაცხყოფას, არ გექნებოდათ რაღაც პროტესტის განცდა?

ჩვენ საზოგადოება გვთხოვს, რომ გავხდეთ ისეთი სასამართლო, როგორიც არის გერმანიასა და ამერიკაში, ამიტომ ხომ შეიძლება ჩვენც გვქონდეს პრეტენზია, რომ ჩვენი ჟურნალისტიკა მუშაობდეს ისე, როგორ CNN და BBC.

აქ არის საუბარი, მოწოდება დიალოგისაკენ. მე მინდა შედგეს ფართო შეხვედრა და ვუთხრა, რომ როგორი პატივისცემითაც ეპყრობა სასამართლო სისტემა სამოქალაქო საზოგადოებას, იგივე პატივისცემა იყოს სასამართლოს მისამართითაც. ჩემი მიზანი არის, რომ ამ შეხვედრაზე ერთმანეთს ჩავხედოთ თვალებში, კონფრონტაციის რეჟიმი გადავიყვანოთ დიალოგის რეჟიმში და ვისაუბროთ ერთმანეთთან თუნდაც კრიტიკით, მაგრამ არა ლანძღვით.

მე მაგალითად, ვთვლი, რომ როდესაც მოსამართლეს სულგაყიდულსა და ათას უბედურებას უწოდებ, კარგი იქნებოდა რაიმე შემაკავაბელი მექანიზმი არსებობდეს ამასთან დაკავშირებით, მაგრამ ამან არ უნდა შეზღუდოს სიტყვის თავისუფლება. ამიტომ ჩვენ უნდა დავიცვათ ბალანსი შეურაცხყოფასა და გამოხატვის თავისუფლებას შორის. ჩვენ თუ დავიცავთ ამ ბალანსს და შეურაცხყოფა იქნება თუნდაც გაკიცხვის საგანი, ეს იქნება იდეალური“, - განაცხადა ლევან მურუსიძემ.