"ტყუილად ნუ ირჯებით, ხალხის ზურგს უკან გარიგება ჩემი ინტერესი არ არის"

"ტყუილად ნუ ირჯებით, ხალხის ზურგს უკან გარიგება ჩემი ინტერესი არ არის" - გიორგი მარგველაშვილი

პოლიტიკა - 13:33, 28 Apr, 2017

2080

პრეზიდენტი საქართველოს კონსტიტუცით ვაჭრობას არ აპირებს. განცხადებები დღეს გიორგი მარგველაშვილმა ახალციხეში სამცხე-ჯავახეთის სახელმწიფო უნივერსიტეტში სტუდენტებთან შეხვედრისას გააკეთა.
ქვეყნის პირველი პირი ხაზგასმით აღნიშნავს, რომ მისი ინტერესი ამომრჩევლის ზურგს უკან მოქმედებები არ არის. პრეზიდენტისთვის გაუგებარია რა კომპრომისზე საუბრობს მართველი პარტია.

„გაჟღერდა გარკვეული ნოტები, რომ თითქოს რაღაც პოლიტიკური კომპრომისია და 2018 წლიდან იქნება პრეზიდენტი არჩეული არაპირდაპირი გზით და არა 2023 წლიდან.

რაღაც პოლიტიკურ კომპრომისებზე საუბრობენ, თითქოს ვინმე რამე დიალოგში შედის საკონსტიტუციო კომისიასთან და მის მესვეურებთან.

არასდროს, კონკრეტულად მე, არც არავის შევეკვრები და არასოდეს ვივაჭრებ კონსტიტუციით; არ ვივაჭრებ იმ ძირითადი დოკუმენტით, რომელიც მიმაჩნია, რომ უნდა იყოს ყველას გამაერთიანებელი და არა ცალკეული პოლიტიკოსების, რაღაც ამბიციების შემკრები.

არასოდეს მივაჭრია ამ თემით და, არც არასოდეს არავინ იფიქროს, რომ მევაჭროს ამ საკითხზე, რასაც ჰქვია ქვეყნის მთავარი დოკუმენტი.

ასევე, მოვუწოდებ ყველას, ვინც ამ საკითხზე გამოთქვამს საკუთარ პოზიციას - მე მესმის, რომ ყველა არის პოლიტიკოსი და ყველას თავისი ინტერესი აქვს, მაგრამ ამ დოკუმენტზე ვაჭრობა, ამ დოკუმენტში რაღაც, შიდა ინტერესების ჩადება უაღესად არასწორია.

აქ ჩვენ ყველა მართლა გულწრფელები უნდა ვიყოთ და პასუხად ამ გზავნილებზე, მინდა ვთქვა, რომ ნუ ირჯებიან ტყუილად - ჩემი ინტერესი არ არის ხალხის ზურგს უკან ვინმესთან გარიგება კონსტიტუციაზე!“- განაცხადა გიორგი მარგველაშვილმა.

პრეზიდენტის განცხადებით, საკონსტიტუციო კომისიამ კონსენსუსის გარეშე მიიღო საკონსტიტუციო ცვლილებების პროექტი.

მარგველასვილმა სიტყვით გამოსვლისას ყურადღება გაამახვილა იმ ფაქტზე, რომ ქვეყნისათვის უმნიშვნელოვანეს, ძირითად, ჩარჩო კანონის პროექტს ხელი არ მოაწერა არცერთმა ოპოზიციურმა ძალამ და მათ დატოვეს კომისია.

როგორც საქართველოს პრეზიდენტმა სტუდენტებთან შეხვედრისას თქვა, პარლამენტის არჩევის წესთან დაკავშირებით კომისიამ არ გაითვალისწინა ოპოზიციური პარტიების აზრი, რომელიც ეხებოდა საარჩევნო ბარიერის დაწევას, საარჩევნო ბლოკებად გაერთიანების უფლებას, გადაუნაწილებელი მანდატების გადანაწილების საკითხებს.

პრეზიდენტის აზრით, საარჩევნო ბლოკების შექმნის აკრძალვით, ოპოზიციური პარტიების არგუმენტების მიხედვით, მათ გაუჭირდებათ საარჩევნო ბარიერის გადალახვა. ამის გათვალისწინებით, იქმნება შესაძლებლობა, რომ მივიღოთ არა მრავალპარტიული, არამედ, ორპოლუსიანი პარლამენტი.

პრეზიდენტის თქმით, ასევე ოპოზიციურ პარტიებს უსამართლოდ მიაჩნიათ, რომ გადაუნაწილებელ მანდატებს მხოლოდ გამარჯვებული პოლიტიკური ძალა ითვისებს, არც ეს უსამართლობა არ არის გასწორებული, რომელიც არც ამომრჩევლისათვისაა მისაღები, რადგან მის, სხვა პარტიისათვის მიცემულ ხმას ითვისებს არჩევნებში გამარჯვებული, სხვა პარტია, რომლისთვისაც მას ხმა არ მიუცია.

გიორგი მარგველაშვილმა კამპანია „კონსტიტუცია ყველასია“, რომლის ფარგლებშიც საქართველოს პრეზიდენტმა საქართველოს ხუთი რეგიონი შემოიარა და უკვე მერვე შეხვედრა გამართა, მარტში დაიწყო და იგი საკონსტიტუციო რეფორმის პროცესში მოსახლეობის ჩართულობის გაზრდას ისახავს მიზნად.

ახალგაზრდებთან, არასამთავრობო ორგანიზაციებთან და პოლიტიკურ პარტიებთან შეხვედრისას, რომელსაც ადმინისტრაციის უროსი გიორგი აბაშიშვილი და პრეზიდენტის მრჩევლები ესწრებიან, საზოგადოების წარმომადგენლებს საშუალება აქვთ საკუთარი მოსაზრებები გამოთქვან და შეკითხვა დაუსვან საქარველოს პრეზიდენტს იმ საკონსტიტუციო ცვლილებებთან დაკავშირებით, რომელიც უკვე გამოაქვეყნა საკონსტიტუციო კომისიამ.