საქართველოს პარლამენტის თავმჯდომარე მოსამართლეებს შეხვდა. ირაკლი კობახიძემ მათ საკონსტიტუციო ცვლილებების პაკეტი გააცნო. შეხვედრის დასრულების შემდეგ კობახიძემ კომენტარი პრეზიდენტის არჩევის წესზე გააკეთა.

მან ასევე ისაუბრა იმ გარემოებებთან დაკავშირებით რა შემთხვევაშიც მოხდება პრეზიდენტის არჩევის წესის ცვლილება. მან ასევე აღნიშნა, რომ პრეზიდენტი მონაწილეობს პარლამენტის წინააღმდეგ მიმართულ კამპანიაში. ამ გარემოებებს ასახელებს მნიშვნელოვან ფაქტორად ირაკლი კობახიძე.

„ჩვენ ჯერ კიდევ გვაქვს დიდი იმედი, რომ კომპრომისს აზრი არ დაეკარგება. თუმცა, არის კონკრეტული პროცესები, რომლებიც საპირისპიროზე მიუთითებენ. სამწუხაროდ, საქართველოს პრეზიდენტმა დაიწყო კამპანია, სახელმწიფო საკონსტიტუციო კომისიის წინააღმდეგ, რომელიც გრძელდება და ეს კამპანია გაგრძელდება როგორც ჩანს, საქართველოს პარლამენტის წინააღმდეგ. ბოლოს შედგა შეხვედრა პრეზიდენტის ადმინისტრაციის უფროსსა და პოლიტიკურ პარტიებსა და ეგრეთ წოდებულ ექსპერტებს შორის, სადაც ისინი შეთანხმდნენ იმაზე, თუ როგორ უნდა დაგეგმონ ერთობლივი კამპანია საქართველოს პარლამენტის წინააღმდეგ. ჩვენი ოპონენტების მხრიდან არასწორი ნაბიჯები იდგმება, პრეზიდენტის თაოსნობით, ეს არის ძალიან სამწუხარო მოვლენა. პრეზიდენტი, რომელიც უნდა იყოს ზეპარტიული ფიგურა ამ სისტემაში, პარტიებთან თანხმდება, თავისი ადმინისტრაციის მეშვეობით, რომლის სტატუსი საერთოდ გაუგებარია. თავისი ადმინისტრაციის უფროსის მეშვეობით, ხვედება პოლიტიკურ პარტიებს, ეგრეთ წოდებულ ექსპერტებს და მათთან თანხმდება იმაზე, თუ როგორ უნდა მიიტანონ შეტევა საქართველოს პარლამენტზე“, - განაცხადა ირაკლი კობახიძემ.