TI „აუცილებელი საზოგადოებრივი საჭიროებისათვის საკუთრების ჩამორთმევის შესახებ“ პროექტში სამართლებრივ ხარვეზებს ხედავს

პოლიტიკა - 11:14, 28 Apr, 2017

1145

"აუცილებელი საზოგადოებრივი საჭიროებისთვის საკუთრების ჩამორთმევის შესახებ" მთავრობის საკანონმდებლო პროექტს „საერთაშორისო გამჭვირვალობა-საქართველო“ ეხმაურება და იმ ხარვეზებზე საუბრობს, რომელსაც არასამთავრობო ორგანიზაციის აზრით აღნიშული კანონპროექტი შეიცავს, ორგანიზაციის იურისტის თეო ზაქარაშვილის თქმით ახალი კანონპროექტი ბევრ პროცედურულ საკითხთან დაკავშირებით უკეთეს სტანდარტს ამკვიდრებს, ვიდრე დღეს მოქმედი კანონი, თუმცა არის ხარვეზები, რომელიც უნდა გამოსწორდეს. მისი განცხადებით იმ შემთხვევაში როცა ექსპროპრიატორი ქონების ჩამორთმევისთვის სასამართლოს მიმართავს, შესაძლოა მესაკუთრეებს გარკვეული დაბრკოლებები შეხვდეთ:

"პრაქტიკიდან გამომდინარე, არსებობს დაბრკოლებები, რაც შეიძლება - მესაკუთრეებს შეხვდეს, როცა ექსპროპრიატორი მისი ქონების ჩამორთმევისთვის სასამართლოს მიმართავს. კანონპროექტი ჩვენ ორი პრინციპისგან შემდგარ სისტემას გვთავაზობს: - მიწის ჩამორთმევის საკითხზე სასამართლო ადმინისტრაციული წესით მსჯელობს, ხოლო კომპენსაციასთან დაკავშირებით - სამოქალაქო წესით. ის, რომ ადმინისტრაციულის მიერ დადგენილ ფასს სამოქალაქომ უნდა გადახედოს, ვფიქრობთ, რომ სამართლებრივი პრინციპიდან გამომდინარე, სწორი მიდგომა არ არის. გამოდის, რომ ქონების ექსპროპრიაციის შემთხვევაში, პროცესი ადმინისტრაციული წესით სწრაფად უნდა წავიდეს, ხოლო თუკი მოქალაქე გადაწყვეტს, რომ ფასი არ არის სათანადო, ეს სასამართლომ სამოქალაქო წესით უნდა განიხილოს. ეს ნიშნავს, რომ დავა ძალიან დიდხანს შეიძლება გაგრძელდეს, რაც მესაკუთრისთვის შეიძლება არ არის მისაღები და კომფორტული, როცა ექსპროპრიატორისთვის ძალიან მისაღები და კომფორტულია საკითხის სწაფად განხილვა და ქონების მიღება.“ - განაცხადა თეო ზაქარაშვილმა.

შეგახსენებთ, "აუცილებელი საზოგადოებრივი საჭიროებისთვის საკუთრების ჩამორთმევის წესის შესახებ" მთავრობის კანონპროექტი პარლამენტის რეგიონული პოლიტიკისა და თვითმმართველობის კომიტეტმა პირველი მოსმენით განიხილა და მხარი დაუჭირა.