"ადამიანის უფლებების მდგომარეობა ოკუპირებულ ტერიტორიებზე" - ქართულმა მხარემ ევროსაბჭოში რეზოლუცია დაარეგისტრირა

პოლიტიკა - 09:47, 28 Apr, 2017

873

ევროსაბჭოში ბიუროს სხდომაზე საქართველოს ოკუპირებულ ტერიტორიებზე ადამიანის უფლებების მდგომარეობის შესახებ რეზოლუციის პროექტი დარეგისტრირდა. პროექტის ინიციატორი ქართული ოცნების წევრი თამარ ჩუგოშვილია და მას 20 დეპუტატი აწერს ხელს. პროექტის მიხედვით, ევროსაბჭოს წარმომადგენლებს ადამინების უფლებების დაცვის მონიტორინგის მიზნით, ოკუპირებულ ტერიტორიებზე წვდომის შესაძლებლობა უნდა ჰქონდეთ. რეზოლუციის პროექტი საზაფხულო სესიაზე უნდა განიხილონ.

„მოთხოვნა რეზოლუციის შექმნის თაობაზე ითვალისწინებს საქართველოს ოკუპირებულ ტერიტორიებზე ადამიანის უფლებების მონიტორინგს. ანუ იმას, რომ ევროსაბჭოს წარმომადგენელი დაიშვას ტერიტორიებზე და მიეცეს შესაძლებლობა, რომ შეაფასოს იქ არსებული მდგომარეობა ადამიანის უფლებათა დაცვის კუთხით. ჩვენ ვიცით, რომ ამ ტერიტორიებზე ძალიან მძიმე მდგომარეობა არის, განსაკუთრებით მძიმეა ეთნიკურად ქართველი მოსახლეობის დისკრიმინაცია,“ - განაცხადა თამარ ჩუგოშვილმა.

დოკუმენტს მხარს უჭერს ევროპული საქართველოც, დავით ბაქრაძის თქმით ევროსაბჭოში ასეთი დოკუმენტების შემოტანა აუცილებელია და მისი პოლიტიკური ძალა ყველა კონტაქტს გამოვიყენებ იმისთვის, რომ ყველა ასეთი რეზოლუცია იქნას მხარდაჭერილი.