ირაკლი სესიაშვილს „ნაციონალური მოძრაობის“ წინააღმდეგ პროკურატურაში საჩივარი შეაქვს, უმრავლესობის დეპუტატი ოპონენტებს ცილისწამებაში ადანაშაულებს, კერძოდ, ენმ-ს ინფორმაციით ირაკლი სესიაშვილის შვილის თითის ანაბეჭდები ორი წლის წინ მომხდარ ქურდობის საქმეში ფიგურირებს, როგორც პარტიაში აცხადებენ, ამის შესახებ დავით სესიაშვილის სუს-ში დასაქმების შემდეგ მისი პირადი მონაცემების გადამოწმებისას გახდა ცნობილი.

„ერთიან ნაციონალუ მოძრაობაში“ აცხადებენ, რომ აღნიშნულ საქმეს ძალოვანი უწყების მაღალჩინოსნები ფარავენ.

„საქმე ეხება 2015 წლის მარტში ჩადენილ ქურდობას, მანქანის გატეხვას, რომელიც არის ჩემი შვილის ბავშვობის მეგობრის ავტომობილი. 5 წლიდან ჩემი შვილი მეგობრობს ამ ადამიანთან, ისევე, როგორც მისი მშობლები არიან ჩემი ბავშვობის მეგობრები. თავისთავად ცხადია, რომ ყოველდღიურ რეჟიმში მათ ჰქონდათ ურთიერთობა და ამ მანქანაზე აღმოჩენილია რამდენიმე ადამიანის თითის ანაბეჭდი, მათ შორის ჩემი შვილის და თავისთავად, ეჭვი არ შეეპარება საღად მოაზროვნე საზოგადოებას, რომ ეს ბუნებრივი რამ არის, რომ ავტომობილზე რამდენიმე ადამიანის ანაბეჭდი არის,“ - განაცხადა ირაკლი სესიაშვილმა.