"მივმართავ სამართალდამცველებს, მოახდინონ რეაგირება ამ ცრუ დასმენაზე"- სესიაშვილს ენმ-ს წინააღმდეგ პროკურატურაში საჩივარი შეაქვს

პოლიტიკა - 12:20, 27 Apr, 2017

1695

ირაკლი სესიაშვილს „ნაციონალური მოძრაობის“ წინააღმდეგ პროკურატურაში საჩივარი შეაქვს. უმრავლესობის დეპუტატი ოპონენტებს ცილისწამებაში ადანაშაულებს, კერძოდ, ენმ-ს ინფორმაციით ირაკლი სესიაშვილის შვილის თითის ანაბეჭდები ორი წლის წინ მომხდარი ქურდობის საქმეში ფიგურირებს. როგორც პარტიაში აცხადებენ, ამის შესახებ დავით სესიაშვილის სუს-ში დასაქმების შემდეგ, მისი პირადი მონაცემების გადამოწმებისას გახდა ცნობილი.

„ერთიან ნაციონალუ მოძრაობაში“ აცხადებენ, რომ აღნიშნულ საქმეს ძალოვანი უწყების მაღალჩინოსნები ფარავენ.

„ნაციონალური მოძრაობისთვის დამახასიათებელია სიცრუის, ტყუილების ტირაჟირება, ცილისამება არის მათი პოლიტიკური სტრატეგია, თუმცა, ამ შემთხვევაში ისინი უკვე შეეხნენ ჩემს ოჯახს, გუშინ ნაციონალურმა მოძრაობამ მტკიცებით ფორმაში განაცხადა, რომ თითქოს ჩემს შვილს დანაშაულთან ჰქონდა კავშირი და მეტიც, სამართალდამცავებმა თითქოს მიჩქმალეს აღნიშნული საქმე, ამიტომ, მე მოვედი დღეს პროკურატურაში და მივმართავ პროკურატურას, ერთის მხრივ ფაქტი გამოიძიოს, რომ საზოგადოებამ სიმართლე ნახოს, გაიგოს ის სიმართლე, რომ ჩემს შვილს რა თქმა უნდა, არ და ვერ ექნებოდა ვერანაირი კავშირი ამ ქურდობასთან, მეორეს მხრივ, სამართლებრივი რეაგირება მოახდინოს ამ ცრუ დასმენაზე, გამოიყვანეს ვინმე იოსელიანი, რომლის ყველაზე დიდი პოლიტიკური მიღწევა მდგომარეობს იმაში, რომ არის ბოკუჩავას ქმარი და ამით არის ყველაფერი ნათქვამი“, - განაცხადა ირაკლი სესიაშვილმა.