კონსტიტუციის ახალი პროექტი პარლამენტში ოფიციალურად დღეს დარეგისტრირდება

პოლიტიკა - 10:22, 27 Apr, 2017

1663

პარლამენტში კონსტიტუციის ახალი პროექტი დღეს ოფიციალურად დარეგისტრირდება. დოკუმენტს დეპუტატთა 76 ხელმოწერა დასჭირდება - რის საფუძველზეც პროექტს ინიცირება უკვე ბიუროზე მოხდება, რის შემდეგ საკანონმდებლო ორგანოში საერთო სახალხო განხილვების უზრუნველსაყოფად სპეციალური კომისია შეიქმნება.

კომისიამ უნდა წარმოადგინოს განხილვების გრაფიკი და ჩატარების ადგილი. კომისიას ერთი თვის ვადა აქვს და ის ვალდებულია საკანონმდებლო ორგანოს განხილვების ანგარიში წარუდგინოს.

დეპუტატების თქმით, პარალელურად მიიღებენ ვენეციის კომისიის დასკვნას. პარლამენტი დოკუმენტს სამი მოსმენით უყრის კენჭს. იმისთვის, რომ პროექტი ძალაში შევიდეს, მეორე და მესამე მოსმენებს შორის სამთვიანი დისტანცია უნდა იყოს.

უმრავლესობაში ამბობენ, რომ წლის ბოლოს ახალ, დემოკრატიულ კონსტიტუციას მიიღებენ. ქართულ ოცნებაში აცხადებენ, რომ ყველაფერი გაკეთდება რათა კონსტიტუაცია სრულყოფილი იყოს.

საერთო სახალხო განხილვებში მონაწილეობას აქტიურად გეგმავს უმცირესობა. ოპოზიცია და სამოქალაქო სექტორი კი კონსტიტუციის პროექტის არსებულ რედაქციას ხელისუფლების უზურპაციად მიიჩნევენ და ბრძოლის აუცილებლობაზე აკეთებენ აქცენტს.