"მთავრობა ვაიძულეთ, ეს იდეა გაეზიარებინა"- ჭიაბერაშვილი ეკონომიკური დანაშაულის სისხლის სამართლებრივ ლიბერალიზაციაზე

პოლიტიკა - 17:55, 25 Apr, 2017

1961

მთავრობის ეკონომიკურ გეგმასთან დაკავშირებით კომენტარი „მოძრაობა თავისუფლებისთვის- ევროპული საქართველოს“ წევრმა ზურაბ ჭიაბერაშვილმა გააკეთა. მისი თქმით მთავრობა იძულებული გახდა ეკონომიკური დანაშაულების სფეროში სისხლის სამართლის კოდექსის ლიბერალიზაცია დაეწყო:

„როგორც კი საზოგადოებას პენსიის 50-ლარიანი მომატების შესაძლებლობა დავანახეთ, 2015 წელს მთავრობა იძულებული გახდა, პენსია 20 ლარით გაეზარდა. ახლაც, როგორც კი ეკონომიკური დანაშაულების სფეროში სისხლის სამართლის კოდექსის ლიბერალიზაციის კამპანია დავიწყეთ, მთავრობა ვაიძულეთ, ეს იდეა გაეზიარებინა. 2017 წლის 21 მარტს "ევროპულმა საქართველომ", მცირე და საშუალო ბიზნესის მხარდაჭერის პროგრამის ფარგლებში, პარლამენტში წარადგინა კანონპროექტი, რომელიც ეკონომიკური დანაშაულების სფეროში სისხლის სამართლის კოდექსის ლიბერალიზაციას გულისხმობს. ამ კანონპროექტში ეკონომიკური დანაშაულის კატეგორებში იზრდება ზღვრები, რომლის ზემოთაც იწყენა ბიზნესის სიხლისსამართლებრივი პასუხისმგებლობა.

მაგალითად, სისხლის სამართლის კოდექსის 218 მუხლში (გადასახადისათვის თავის არიდება), ჩვენი პროექტით,დიდ ოდენობად ჩაითვლება, როდესაც გადასახდელი გადასახადის თანხა აღემატება 200,000 ლარს, ხოლო განსაკუთრებით დიდ ოდენობად – როდესაც თანხა აღემატება 500,000 ლარს. ამჟამინდელი ოდენობები, შესაბამისად, 50,000 და 100,000 ლარია.

ასევე, 200-3 მუხლში (სამეწარმეო საქმიანობისათვის საქონლის სასაქონლო ზედნადების გარეშე ტრანსპორტირება, მყიდველის მოთხოვნისას სასაქონლო ზედნადების გაუცემლობა ან საქონლის შეძენისას სასაქონლო ზედნადების მიღებაზე უარი) დიდ ოდენობად ჩაითვლება, როდესაც მიწოდებული/მისაწოდებელი საქონლის ღირებულების თანხა აღემატება 100,000 ლარს, ხოლო განსაკუთრებით დიდ ოდენობად - 200,000 ლარს. ამჟამინდელი ოდენობები, შესაბამისად, 10,000 და 25,000 ლარია.“- განაცხადა ზურაბ ჭიაბერაშვილმა.