„უკბილო არგუმენტებს იძლევიან, ალბათ პოლიტიკოსის საყმაწვილო სენია“ - კაციტაძე "ოცნების" ლიდერებს არგუმენტებს უწუნებს

პოლიტიკა - 12:53, 25 Apr, 2017

1741

„ახალი მემარჯვენეების“ ლიდერი და ოპოზიციური პარტიების მიერ შექმნილი საკორდინაციო საბჭოს წევრი, მამუკა კაციტაძე პარლამენტის თავმჯდომარესა და მმართველი პარტიის ლიდერს, მამუკა მდინარაძეს „საყმაწვილო სენისგან“ გათავისუფლებას ურჩევს.

საქმე ეხება 14 ოპოზიციური პარტიის მიერ პარლამენტში წარდგენილ საკანონმდებლო წინადადებების ირგვლივ გაკეთებულ განცხადებებს. გუშინ ოპოზიციის წინადადება ირაკლი კობახიძემ გააკრიტიკა და თქვა, რომ „ოპოზიციური პარტიები კანონპროექტებზე მსჯელობისთვისაც არ არიან მომწიფებული”.

მდინარაძემ კი აღნიშნა, რომ „ოპონენტი პარტიები უკვე არარსებულ კანონებში ითხოვენ ცვლილებებს”.

ცნობისთვის, ოპოზიციის წარმომადგენლები “ადგილობრივი თვითმმართველობის შესახებ" კოდექსში და “თბილისის შესახებ" კანონში ცვლილებებს ითხოვდნენ.

მმართველი პარტიის პოზიციით, ოპოზიციამ “საარჩევნო კოდექსთან“ ერთად, ცვლილების განხორციელება “ადგილობრივი თვითმმართველობის შესახებ“ კანონში მოითხოვა, რომელიც დღეს “ადგილობრივი თვითმმართველობის კოდექსის“ სახით არსებობს და ასევე, პარლამენტს “თბილისის შესახებ“ კანონში ცვლილებების ინიციატივით მიმართა, რომელიც 2014 წლიდან ძალადაკარგულია.

„ნიუპოსტი“ საკითხის კომენტირებისთვის, მამუკა კაციტაძეს დაუკავშირდა, რომელიც მმართველი პოზიციის არგუმენტებსა და შეფასებებს „სასაცილოს“ უწოდებს.

„გულწრფელად გეტყვით ის რაც გუშინ წავიკითხე და მოვისმინე, პარლამენტის თავმჯდომარის, თუ ქართული ოცნების კიდევ ერთი სახის, ბატონი მდინარაძის მხრიდან, სასაცილოა სატირალი რომ არ იყოს.

საქმე შემდეგში მდგომარეობს: ჩვენ, კვალიფიციური ოპოზიციური პარტიების საკოორდინაციო საბჭომ, წარვადგინეთ რა საკონსტიტუციო ცვლილებების პაკეტი, მას დავურთეთ ადგილობრივი თვითმმართველობის არჩევნებში შესატანი, ჩვენი აზრით აუცილებელი ცვლილებები. თავის დროზე ცალკე არსებობდა ორგანული კანონი "ადგილობრივი თვითმმართველობის შესახებ" და ჩვეულებრივი კანონი "თბილისის შესახებ". შესაბამისად ჩვენ, ეს ორივე კანონი მოვიხსენიეთ, საარჩევნო კოდექსთან ერთად, რომელიც ჩვენი შეთავაზებით საჭიროებდა ცვლილებების გათვალისწინებას. ნაცვლად იმისა რომ ამ ორ ჭაბუკს, შინაარსობრივად გაეანალიზებინა, გაეაზრებინა ჩვენს მიერ წარდგენილი წინადადებები, საპასუხო რომ არაფერი ჰქონდათ, მოგვცეს ასეთი პასუხი, რომ 2014 წელს ორგანული კანონი "თვითმმართველობის შესახებ" და კანონი "დედაქალაქის შესახებ" ქართულ ოცნებას ერთ კოდექსში მოუქცევია და მისთვის "ადგილობრივი თვითმმართველობის კოდექსი" დაურქმევია და პასუხი გვესმის ასეთი, რომ ამ ხალხმა ისიც კი არ იცისო, რომ "დედაქალაქის კანონი" საერთოდ არ არსებობსო, ხოლო "ადგილობრივი თვითმმართველობისას კანონი" კი არ ჰქვია, არამედ კოდექსი ჰქვიაო. ჩვენს წინადადებებზე მთელი პასუხი იყო ეს.

მოდი და ამ ორ ყმაწვილზე ნუ გაგეცინება. ისინი პოლიტიკაში ფეხის ადგმის პროცესში არიან და რაღაც უკბილო არგუმენტებს იძლევიან. შე კაი კაცო, თუ არ შეგიძლია პასუხი გამცე, ან ბოლოს და ბოლოს არ მეთანხმები, მითხარი რომ არ გეთანხმები და არ გავითვალისწინებ შენს აზრს. რაღაც სამართლებრივ კაზუისტურ დეტალებით ნუ ცდილობ, რომ სიტუაციიდან თავი გამოიყვანო. რას იზამ, ესეც ალბათ პოლიტიკოსის საყმაწვილო სენია. დარწმუნებული ვარ რომ, როცა ცოტა უფრო წამოიზრდებიან და დაბრძენდებიაან ეს სენი გადაუვლით და უფრო არსობრივი, შინაარსობრივი, თვისობრივი საუბრისთვის იქნებიან მზად“- აღნიშნა მამუკა კაციტაძემ.