საპარლამენტო უმრავლესობა და უმცირესობა ვენეციის კომისიის წევრებს შეხვდებიან

პოლიტიკა - 10:36, 25 Apr, 2017

1085

საქართველოს სახელმწიფო საკონსტიტუციო კომისიის მიერ ცვლილებებთან დაკავშირებით შემუშავებული დოკუმენტზე ვენეციის კომისიას ინფორმაციას, როგორც საპარლამენტო უმრავლესობა ასევე უმცირესობაც მიაწვდის. ევროპული საქართველოსა და ქართული ოცნების წევრები რადიკალურად განსხვავებულ პოზიციებს ვენეციის კომისიის წევრებს ცალცალკე გააცნობენ, შესაბამისად მოლოდინებიც ადიკალურად განსხვავებული აქვთ.

საპარლამენტო უმრავლესობა ევროპელი ექსპერტებისგან, მთლიანობაში კრიტიკულ შენიშვნებს არ ელოდება, თუმცა მზადყოფნას გამოთქვამს გამოთქმული მოსაზრებები გაითვალისწინოს.

„მზაობას გამოვთქვამთ იმისთვის, რომ გავითვალისწინოთ ვენეციის კომისიის რეკომენდაციები და ვენეციის კომისიის ნეგატიური დასკვნის ან ნეგატიური შეფასების მქონე ნორმები არ ჩავდოთ საკონსტიტუციო ცვლილებების პროექტში,“ - განაცხადა ვიცე პიკერმა თამარ ჩუგოშვილმა.

უმრავლესობისგან განსხვავებით შემუშავებული საკონსტიტუციო ცვლილებები არადემოკრატიულად მიაჩნია „ევროპულ საქართველოს“ და ვენეციის კომისიისგან შესაბამისი შენიშვნების მოლოდინიც აქვს:

„არ შეიძლება, რომ მხოლოდ და მხოლოდ ერთ ჯგუფს ჰქონდეს პრეტენზია ჭეშმარიტებაზე, მხოლოდ ის იყოს მართალი და ცდებოდეს ყველა დანარჩენი. იქნება კონკრეტული თემებიც, როგორიც არის მაგალითად, გადაუნაწილებელი ხმების მხოლოდ პირველ ადგილზე გასულ პარტიასთან მოხვედრა. ჩვენი პარტიაც რომ გავიდეს პირველ ადგილზე, მაინც გაუმართლებელი და საზიანო იქნება ამ გაუნაწილებელი ხმების პირველ ადგილზე გასულ ნებისმიერ პარტიასთან მოხვედრა,“ -განაცხადა ევროპული საქართველოს წევრმა გიორგი კანდელაკმა.

ოფიციალურად დოკუმენტს რეკომენდაციებისთვის ვენეციის კომისია, საკონსტიტუციო ცვლილებების დარეგისტრირებისა და პროექტის თარგმნის შემდეგ, რამდენიმე დღეში მიიღებს.