მუშტი-კრივი ხაშურის გამგეობაში და "ქურდული" გარჩევა შენობის უკან

პოლიტიკა - 16:04, 24 Apr, 2017

15166

ინციდენტი ხაშურის გამგეობაში, მოქალაქე ზაზა მეხრიშვილის განცხადებით მას უწყებაში ფიზიკურად გაუსწორდნენ. ,,ნიუპოსტის“ კორესპონდენტის ცნობით, ინციდენტი რომელზეც მოქალაქე საუბრობს გამგეობის ეკონომიკური სამსახურის უფროსის კაბინეტში მოხდა და მას გამგეობის ორი თანამშრომელიც შეესწრო. მეხრიშვილი ამბობს, რომ სერგო ლალიაშვილის გაღიზიანება სოციალურ ქსელში მის მიერ, უწყების მიმართ დაწერილმა კრიტიკულმა პოსტმა გამოიწვია. „დავწერე თუ არა ფეისბუკზე პოსტი დამირეკა სერგო ლალიაშვილმა და მთხოვა შეხვედრა. მე უარი ვუთხარი, რა აზრი არქს შეხვედრასთქო. ამის მერე ჩემს საქმეზე მივედი გამგეობაში და რომ გამოვდიოდი კიბებზე დამხვდა და კაბინეტში გაყოლა მთხოვა. გავყევი, რომ შევედით კაბინეტში დამიწყო ლანძღვა-გინება, გამოიწია ჩემზე, ხელი მკრა და ამ ყვირილზე შემოვარდნენ მისი თანამშრომლები. ორმა მათგანმა ხელები გადამიგრიხა, ის ორი კი სერგოს აჩერებდა. მე ვუთხარი რეებს აკეთებთ საჯარო მოხელეები ხართ მეთქი და კარგი მაშ გარეთ გავიდეთო. ჩამომიყვანეს დაბლა, გამიყვანეს გამგეობის უკან და დამიწყეს ქურდული გარჩევები“-ამბობს მეხრიშვილი.

„ნიუპოსტი“ შეეცადა ბრალდების ადრესატთან დაკავშირებას, თუმცა როგორც გავარკვიეთ გამგეობის ეკონომიკური სამსახურის უფროსი სერგო ლალიაშვილი შვებულებაში იმყოფება და ტელეფონიც გათიშული აქვს. მის ნაცვლად მეხრიშვილის ბრალდებებს გამგეობის სხვა თანამშრომლემა უპასუხა „ჩვენ დავუთმეთ, არ გვინდოდა ახალგაზრდა კაცია და გაგვენაწყენებინა. წარულიც ისეთი აქვს, რომ სამართალში ნამყოფია. აი უნდა გამოგვეძახებინა პატრული, ადგილზე დაეფიქსირებინათ ყველაფერი და მიგვეცა იმათთვის ჩვენება, პასუხისმგებლობას გაითვალისწინებდნენ მაგისი და მერე გაიგებდა საჯარო მოხელის შეურაცხყოფა როგორ უნდა. ფიზიკურამდე ჩვენ არ მივუშვით თორე, ეგ აუცილებლად გააკეთებდა მაგას. ეხლა გაღმა გვედავება, გამოღმა რომ დარჩეს და როგორ შეგვედავება მაგასაც ვნახავთ“-აცხადებს ნოდარ ივანიშვილი.

შეგახსენებთ, მოქალაქე ზაზა მეხრიშვილსა და ხაშურის გამგეობის მაღალჩინოსნებს შორის დავა დიდი ხანია გრძელდება. გასულ წელს, გამგებელმა გიორგი გურასპაშვილმა სოციალურ ქსელში გამოქვეყნებული პოსტების გამო მეხრიშვილს ტელეფონით სიტყვიერი შეურაცხყოფა მიაყენა. აღნიშნული ჩანაწერი მაშინ მეხრიშვილმა ჟურნალისტებს მიაწოდა და გასაჯაროების შემდეგ გურასპაშვილს საზოგადოებისთვის ბოდიშის მოხდა მოუწია.