„გარდაცვლილი 13 წლის შვილი დედამ ნახა“- "სელფის" გადაღების დროს მომხდარი უბედური შემთხვევა თუ სუიციდი

შემთხვევა - 12:32, 24 Apr, 2017

115335

ვაზისუბნის დასახლებაში მომხდარ შემზარავი შემთხვევის ირგვლივ რამდენიმე ვერსია განიხილება.

გარდაცვლილია 13 წლის გოგონა, რომელიც ერთ-ერთი ვერსიით 8 სართულიანი კორპუსის სახურავიდან ფოტოს გადაღების დროს გადმოვარდა. ასევე საუბრობენ თვითმკვლელობასა და მოზარდის გადმოგდებაზე.

ამ დროდმე უცნობია, მარტო იყო ის თუ ვინმესთან ერთად.

„თქვეს, რომ ბავშვი გადმოვარდა, დაინახეს მიწაზე. როგორ, რანაირად, საიდან არავინ არაფერი არ იცის. ზოგი ამბობს, რომ თამაშობდნენ, ზოგი ამბობს რომ „სელფის“ გამო, ზოგიერთის თქმით, კი ფეხი გაუცურდა და გადმოვარდა. მომხდარის შესახებ ზუსტი ინფორმაცია არავის აქვს“- აცხადებს გარდაცვლილის მეზობელი.

ადგილობრივების თქმით, მოზარდი ავტომობილს დაეცა და ადგილზე გარდაიცვალა.

„დედა ეძებდა თურმე, გარეთ გამოსულა გოგონას მოსაძებნად, ამ დროს საშინელი ხმა გაუგიათ, ავტომობილს ადამიანი დაეცაო, ადგილზე მისულ დედას საკუთარი შვილი უკვე გარდაცვლილი დახვდა. სასწრაფოც იყო მოსული, თუმცა უშედეგოდ“- ამბობს თვითმხილველი.

მეზობლების თქმით, იმ კორპუსის სახურავზე სადაც უბედური შემთხვევა მოხდა, მოზარდები ხშირად იკრიბებიან, რადგან სხვენში ასავლელი ღიაა და უსაფრთხოების ზომებიც არ არის დაცული.

შინაგან საქმეთა სამინისტრომ გამოძიება სისხლის სამართლის 115-ე მუხლით დაიწყო, რომელიც პირის თვითმკვლელობამდე მიყვანას გულისხმობს.