"ძალიან დახვეწილი დოკუმენტი" - კობახიძე ახალი კონსტიტუციის პროექტით კმაყოფილია

პოლიტიკა - 20:15, 22 Apr, 2017

2598

პარლამენტისა დასაკონსტიტუციო კომისიის თავმჯდომარე ირაკლი კობახიძე საკონსტიტუციო ცვლილებების პროექტს "ძალიან დახვეწილი დოკუმენტს" უწოდებს.

"ფართო ჩართულობის საფუძველზე ჩვენ შევიმუშავეთრომელიც შესაბამისობაშია კონსტიტუციური სამართლის პრინციპებთან და აყალიბებს ძალიან დახვეწილ საპარლამენტო მმართველობის მოდელს, რომელიც ეფუძნება ევროპული ქვეყნების საუკეთესო პრაქტიკას. დღეს სახელმწიფო საკონსტიტუციო კომისიაში მხარი დაუჭირეს დოკუმენტს - კონსტიტუციაში ცვლილებების პროექტს, რომელითაც საქართველოს კონსტიტუციაში ფუნდამენტურად იცვლება მმართველობის სისტემასთან დაკავშირებული რეგულაციები"- აღნიშნავს პარლამენტის თავმჯდომარე.

კობახიძის თქმით, "დამოუკიდებელი საქართველოს ისტორიაში პირველად ხდება ის, რომ ხელისუფლება საკუთარი ხელით იზღუდავს სუბიექტურ გარანტიებს. ეს არის პირველი შემთხვევა, როდესაც ცვლილებები ეწინააღმდეგება მმართველი გუნდის სუბიექტურ ინტერესებს".

"ჩვენს წინაშე პარლამენტის მხრიდან 2 ამოცანა იყო დასახული - ეს იყო პირველ რიგში, კონსტიტუციის სრული შესაბამისობის უზრუნველყოფა კონსტიტუციური სამართლის პრინციპებთან. ეს მიზანია ზედმიწევნით მიღწეულია. რაც შეეხება მეორე მიზანს - ეს იყოს ძალიან მყარი კონსტიტუციური ფუნდამენტის შექმნა, სტაბილური, პლურალისტური, დემოკრატიული საპარლამენტო მმართველობის სისტემის ფორმირებისთვის. მეორე მიზანიც ზედმიწევნით მიღწეულია. სწორედ ამ ორ მიზანს ემსახურებოდა ის დოკუმენტი, რომელიც კომისიის მიერ შემუშავდა. ეს არის ძალიან დიდი მიღწევა. ჩვენ გვაქვს ძალიან დიდი იმედი, რომ საბოლოოდ პარლამენტში ექნება მხარდაჭერა იმ დოკუმენტს, რომელიც წარდგენილი იქნება სახელმწიფო საკონსტიტუციო კომისიის მიერ“, - განაცხადა კობახიძემ.

მისი თქმით, 70-80% მაინც იმ ცვლილებებისა, რომლებიც აისახა, ეკუთვნოდა სწორედ ექსპერტებს, არასამთავრობო ორგანიზაციებს და სხვადასხვა კონსტიტუციურ ორგანოებს.

რაც შეეხება ვენეციის კომისიის მოსალოდნელ დასკვნას. პარლამენტის თავმჯდომარე აცხადებს, რომ "ყველა სამართლებრივი შენიშვნა, რომელიც იქნება გამოთქმული ვენეციის კომისიის მიერ, ბოლომდე იქნება გაზიარებული და ასახული საკონსტიტუციო ცვლილებების პროექტში".