"სახალხო დამცველის როლის გაძლიერების ნაცვლად, საუბარია მის შესუსტებაზე"- ნანუაშვილმა საკანონმდებლო ცვლილებებს მხარი არ დაუჭირა

პოლიტიკა - 20:04, 22 Apr, 2017

1888

სახალხო დამცველმა უჩა ნანუაშვილმა საკონსტიტუციო ცვლილებების დღეს მიღებულ პროექტს მხარი არ დაუჭირა.

ომბუდსმენი აღნიშნავს, რომ მისი რეკომენდაციების უდიდესი ნაწილი გათვალისწინებული არ არის.

„განსაკუთრებით სამწუხაროა ის ფაქტი, რომ სახალხო დამცველის როლის გაძლიერების ნაცვლად, ახალ პროექტში საუბარია მის შესუსტებაზე”- ამბობს ნანუაშვილი.

მისივე განცხადებით, სახალხო დამცველის კანონში მთელი რიგი შესწორებები შევიდა, რითაც ფაქტიურად, სახალხო დამცველის შესახებ ჩანაწერი არის დანაწევრებული და მთელი რიგი არსებითი მომენტები მისგან არის ამოღებული.

„ასევე, ჩვენ გვქონდა რამდენიმე ინიციატივა, მათ შორის, შრომის ინსპექციასთან დაკავშირებით, რომ ზედამხედველობის ორგანო ყოფილიყო კონსტიტუციით განსაზღვრული. სოციალური უფლებების კუთხით ყოფილიყო გარკვეული ჩანაწერი. დამოუკიდებელი საგამოძიებო მექანიზმის შექმნასთან დაკავშირებით იყო ჩვენი რეკომენდაცია, რომელიც ასევე არ იქნა გაზიარებული. მართლმსაჯულების ხარვეზის შესაბამისი მექანიზმის შექმნაზე გვქონდა ჩვენ კონკრეტული რეკომენდაცია, რომელიც გულისხმობდა საკონსტიტუციო სასამართლოს უფლებამოსილების გაზრდას და ესეც უარყოფილი იქნა“, - განაცხადა უჩა ნანუაშვილმა.