გიორგი კვირიკაშვილი "ქართული ოცნების" 5 წლისთავთან დაკავშირებით განცხადებას ავრცელებს

პოლიტიკა - 10:12, 22 Apr, 2017

2721

გიორგი კვირიკაშვილი "ქართული ოცნება - დემოკრატიული საქართველოს" დაფუძნების 5 წლისთავთან დაკავშირებით განცხადებას ავრცელებს.
განცხადებაში კვირიკაშვილი ყოფილი პრემნიერის ბიძინა ივანიშვილს ორჯერ ახსენებს და ამბობს, რომ რომ ყოფილი პრემიერის მიერ შექმნილი პარტიის გამოჩენამ გააჩინა იმედი, რომ სახელმწიფო ნორმალური განვითარების გზას დაადგებოდა.

"დღევანდელ დღეს, 5 წლის წინ, ბიძინა ივანიშვილის მეთაურობით დაფუძნდა ახალი პოლიტიკური პარტია ,,ქართული ოცნება - დემოკრატიული საქართველო“, რომელიც დაუპირისპირდა რეპრესიულ მმართველობით სისტემას და დაიწყო ბრძოლა ავტორიტარული რეჟიმის წინააღმდეგ. პარტია ,,ქართული ოცნება - დემოკრატიული საქართველოს“ პოლიტიკურ სივრცეში გამოჩენამ გააჩინა იმედი იმისა, რომ სწორედ ეს პოლიტიკური ძალა ხალხთან ერთად დაამარცხებდა მოძალადე ხელისუფლებას და სახელმწიფო ნორმალური განვითარების გზას დაადგებოდა.

სწორედ 5 წლის წინ, ბიძინა ივანიშვილმა ახლადშექმნილ პოლიტიკურ ძალასთან ერთად დაიწყო უკომპრომისო ბრძოლა და, თვეების განმავლობაში რეპრესიების, დარბევების, უკანონო დაპატიმრებების მიუხედავად, უსისხლოდ, ბრძოლის ერთადერთი იარაღით - პოლიტიკური მეთოდებით, არჩევნების გზით დაამარცხა არსებული რეჟიმი.

,,ქართული ოცნება - დემოკრატიული საქართველო“ გახდა ის პოლიტიკური პარტია, რომელმაც ჩვენს ქვეყანაში დაიწყო რეალური დემოკრატიული ცვლილებები.

ჩვენ პარტიას დღესაც ერთი მიზანი გვამოძრავებს - ეს არის ერთიანი, დემოკრატიული და ძლიერი საქართველო, სახელმწიფო, რომელიც თითოეული მოქალაქის უფლებებისა და კეთილდღეობისთვის ზრუნავს"- აღნიშნავს კვირიკაშვილი.