არასამთავრობოები მოსამართლეების შეურაცხყოფის დასჯად ქმედებად გამოცხადებას კრიტიკულად აფასებენ

პოლიტიკა - 21:19, 21 Apr, 2017

1189

არასამთავრობოები იუსტიციის უმაღლესი საბჭოს ინიციატივას მოსამართლეების შეურაცხყოფის დასჯად ქმედებად გამოცხადებასთან დაკავშირებით კრიტიკულად აფასებენ და აღნიშნავენ, რომ ამით ვერ განვითარდება სასამართლო და ვერ გამოსწორდება სისტემაში არსებული ხარვეზები.

„ასეთი ინიციატივები, რომელიც ჟღერდება არასწორ მოლოდინს ქმნის როგორც მოსამართლეებში, ასევე საზოგადოებაში და მე ვფიქრობ, ეს ინიციატივა დასმულია იმ ძალიან მძიმე კრიტიკის საპასუხოდ, რომელიც ბოლო პერიოდში ისმის“ - განაცხადა ადამიანის უფლებების სწავლებისა და მონიტორინგის ცენტრის ინსტიტუციური რეფორმების პროგრამის დირექტორმა სოფო ვერძეულმა.

საქართველოს ახალგაზრდა იურისტთა ასოციაციის თავმჯდომარე, ანა ნაცვლიშვილი, აღნიშნავს, რომ სასამართლო თვალს ვერ უსწორებს არსებულ რეალობას და ერთადერთ გამოსავალს თავდაცვაში ხედავს.

„სასამართლო ნაცვლად იმისა, რომ თვალი გაუსწოროს არსებულ რეალობას, ერთადერთ თავდაცვას და გამოსავალს ხედავს იმაში, რომ გააჩუმოს კრიტიკული აზრი. გამოსავალი არის სისტემის გაჯანსაღებაში, იმიტომ, რომ არ მგონია, სასამართლო, რომელსაც ექნება ობიექტურობის და სამართლიანობის მაღალი ხარისხი, ვინმემ უსამართლოდ გააკრიტიკოს,“ - განაცხადა ანა ნაცვლიშვილმა.