"კომისიამ მუშაობა ნულოვანი კონსესუსით დაამთავრა"- პრეზიდენტის ადმინისტრაცია პლებისციტის იდეას საინტერესოს უწოდებს

პოლიტიკა - 18:28, 21 Apr, 2017

1383

საქართველოს პრეზიდენტის პოლიტიკური მდივანი ფიქრია ჩიხრაძე პლებისციტის ჩატარებასთან დაკავშირებით „ევროპული საქართველოს“ ინიციატივას ეხმაურება და აღნიშნავს, რომ იდეა საინტერესოა და ამასთან დაკავშირებით შეხვედრები აუცილებლად გაიმართება.
რაც შეეხება საკონსტიტუციო კომისიის საქმიანობას ჩიხრაძემ აღნიშნა, რომ კომისიამ მუშაობა "ნულოვანი კონსენსუსით" დაასრულა.

"გამომდინარე იქიდან, რომ საკონსტიტუციო ცვლილებების პროცესი და კომისიის მუშაობა არ წავიდა თანხმობის გზით, არც პოლიტიკურ აქტორებთან და არც საზოგადოებასთან, ბუნებრივად გაჩნდა ასეთი მოსაზრებები. იგივე იმ შეხვედრებზე, რომელსაც პრეზიდენტი მართავს საზოგადოებასთან ძალიან ხშირად ისმის ამ მიმართულებით მოსაზრებები, პრეზიდენტს მიმართავენ პოლიტიკურ პარტიებში, ექსპერტულ წრეებში გაჩნდა ასეთი მოსაზრებები. რა თქმა უნდა პრობლემურია, როდესაც კომისიამ მუშაობა დაამთავრა ნულოვანი კონსესუსით და კონსტიტუცია, რომ აუცლებლად თანხმობის დოკუმენტი უნდა იყოს, ამაზე ორი აზრი არ არსებობს და ვერავინ ვერ იკამათებს არგუმენტებით.

აქიდან გამომდინარე, იდეა საინტერესოა, ჩვენ კიდევ დავაკვირდებით, გვექნება შეხვედრები, როგორ განვითარდება ეს იდეა და რამდენად იქნება კონსენსუსი ამასთან დაკავშირებით “- განაცხადა ჩიხრაძემ.