ე.წ ბინადრობის მოწმობა- რა პირობებს უყენებს აფხაზეთის დე ფაქტო ხელისუფლება გალის მაცხოვრებლებს

პოლიტიკა - 16:39, 21 Apr, 2017

11828

ოკუპირებული აფხაზეთის გალის რაიონში დეფაქტო ხელისუფლების წარმომადგენლებმა შეხვედრა გამართეს, რომელზეც გალის, ოჩამჩირის და ტყვარჩელის რაიონის მაცხოვრებლებისთვის ბინადრობის ნებართვების გაცემის საკითხზე იმსჯელეს. დე ფაქტო შს მინისტრის ასლან კობახიას განცხადებით, მკაცრად დაისჯება ყველა ვინც ყალბი დოკუმენტების დამზადებაში იქნება შემჩნეული. კობახიას თქმით, არ უნდა განმეორდეს სიტუაცია, როდესაც „საქართველოს მოქალაქის ყალბი დოკუმენტებით ხდებოდა აფხაზეთის მოქალაქეობის მიღება ან მისი „ყიდვა“.

„როდესაც თქვენ გასცემთ მოწმობას, რომ პიროვნება აქ ცხოვრობს, ასჯერ დაფიქრდით, რადგან თქვენთან შესაძლოა პროკურორი ან სახელმწიფო უსაფრთხოების სამსახური მოვიდეს“- მიმართა კობახიამ საპასპორტო განყოფილების თანამშრომლებს.

კობახიამ ხაზი გაუსვა იმასაც, რომ სხვა ქვეყნის მოქალაქეებს მხოლოდ ბინადრობის ნებართვის მიღება შეუძლიათ.

„მე მინდა გავაფრთხილო ყველა, რომ, თუ ადამიანი არის საქართველოს მოქალაქე, ძალიანაც რომ მოინდომოს აფხაზეთის მოქალაქე ვერ გახდება.“- აღნიშნა დე ფაქტო მინისტრმა, მისი თქმით, საქართველოს მოქალაქემ ამ შემთხვევაში უარი უნდა თქვას საქართველოს მოქალაქეობაზე და თხოვნით მიმართოს აფხაზეთის პრეზიდენტს.

აფხაზეთის დე ფაქტო ხელისუფლების მიერ მიღებული კანონის თანახმად, პასპორტის მოღება შეუძლია ადამიანს, რომელიც 1994-1999 წლებში აფხაზეთის ტერიტორიაზე ცხოვრობდა. ეს არის მთავარი მომენტი- განაცხადა აფხაზეთის დე ფაქტო საპასპორტო განყოფილების ხელმძღვანელმა რომან ძაფშბამ.

„მოქალაქემ უნდა მიიტანოს დაბადების მოწმობა, ფოტო, გადახდის ქვითარი, შემდეგ კი მოხდება შემოწმება უშიშროების ხაზით, თუ ადამიანი აკმაყოფილებს ყველა მოთხოვნას, მას მიეცემა აფხაზეთის პასპორტი“- განაცხადა ძაფშბამ.

აფხაზეთის დე ფაქტო მთავრობის წარმომადგენლების თქმით, იმ შემთხვევაში თუ ადამიანს აფხაზეთის მოქალაქეობა არ ეკუთვნის, ის იღებს ბინადრობის უფლებას. ბინადრობის უფლების მიღება შეუძლიათ ადამიანებს, რომლებიიც გალის რაიონის სოფლებში 1999 წლიდან მინიმუმ 10 წელი მაინც ცხოვრობდნენ.

„ასევე ბინადრობის ნებართვის მიღება შეუძლიათ მოქალაქეობის არ მქონე პირებს, რომლებიც აფხაზეთის ტერიტორიაზე 1999 წლიდან ცხოვრობენ და უცხო ქვეყნის მოქალაქეებს, რომლებსაც აფხაზეთის მოქალაქესთან ქორწინება აკავშირებთ. “- აღნიშნა ძაფშბამ.

საცხოვრებელი ადგილის შესახებ მოწმობას სოფლის ხელმძღვანელები გასცემენ და მასში ზუსტად უნდა იყოს მითითებული, რომელი წლიდან ცხოვრობს პირი აღნიშნულ ტერიტორიაზე.

ამ დროისთვის ე.წ. საზღვრის გადაკვეთისას გალის რაიონის მაცხოვრებლები 4 სახის დოკუმენტს იყენებენ, როგორც აფხაზეთის დე ფაქტო ხელისუფლება აცხადებს, წლის ბოლოსთვის მოქმედებაში მხოლოდ ორი სახის დოკუმენტი უნდა დარჩეს. ამასთანავე შეხევდრაზე დაზუსტებული იქნა ისიც, რომ თუ ადამიანი წლის განმავლობაში 6 თვე არ იმყოფება აფხაზეთის ტერიტორიაზე მას ბინადრობის მოწმობა ჩამოერთმევა.