"ადვოკატებს მოგვპარეს მსჯავრდებული" - დაცვის მხარის თქმით, კილაძის შვილი საკნიდან ჩუმად გაიყვანეს

პოლიტიკა - 18:04, 20 Apr, 2017

5765

ჟურნალისტ ელისო კილაძის შვილის ადვოკატი არჩილ ჩუბინიძე "ნიუპოსტთან" აცხადებს, რომ მისი დაცვის ქვეშ მყოფი დავით ხარშილაძე სასჯელაღსრულების დაწესებულებიდან ისე გაიყვანეს, რომ ამის შესახებ არც ერთი მისი უფლებადამცველი ინფორმირებული არ ყოფილა.

ადვოკატი კანონდარღვევაზე საუბრობს და ამბობს, რომ ისინი ფაქტზე შესაბამის რეაგირებას მოახდენენ.

"რამდენიმე დღის წინ, გამომძიებელმა ჩემი, ადვოკატის თანდასწრებით შეუდგინა დავით ხარშილაძეს ადმინისტრაციული სამართალდარღვევის ოქმი. ადვოკატის მონაწილეობა თავიდანვე დაფიქსირებული იყო, თუმცა ხარშილაძემ და მე ოქმს ხელი არ მოვაწერეთ. გამომძიებლისთვის ცნობილი იყო, რომ ხარშილაძეს ჰყავდა ადვოკატი. დღესკი ჩემი კოლეგა, დავით ხარშილაძის მეორე ადვოკატი ნათია კორკოტაძე იმყოფებოდა სასჯელაღსრულების დაწესებულებაში ბრალდებულის მოსანახულებლად და იქ გახდა ჩვენთვის ცნობილი, რომ ხარშილაძე გაყვანილი იყო ადმინისტრაციული წესით დაჯარიმებისთვის სასმართლოში. სამი ადვოკატი ვყავართ ხარშილაძეს და არც ერთი ინფორმირებული არ ვყოფილვართ. ანუ სამ ადვოკატს მოგვპარეს ბრალდებული. ჩუმად აპირებდნენ მის დაჯარიმებას. თუმცა სასამართლომ გონივრული გადაწყვეტილება მიიღო და პროცესი 4 მაისამდე გადადო. ჩვენ სასმართლოზე სწორედ მაშინ გამოვცხადდებით და სავარაუდოდ ადმინისტრაციული საქმე შეწყდება"- განაცხადა ადვოკატმა.