„ანტისახელმწიფოებრივ პროპაგანდასთან და „რბილ ძალასთან“ ბრძოლა ჩვენი ამოცანაა“

„ანტისახელმწიფოებრივ პროპაგანდასთან და „რბილ ძალასთან“ ბრძოლა ჩვენი ამოცანაა“ - თალაკვაძე „გამჭვირვალობის“ ინიციატივაზე

პოლიტიკა - 15:00, 20 Apr, 2017

2253

20 აპრილს, „საერთაშორისო გამჭვირვალობა - საქართველომ“ პარლამენტში წარადგინა საკანონდებლო წინადადება, რომლის ძირითადი მიზანია აიკრძალოს წინასაარჩევნო აგიტაცია, მათ შორის რეკლამის გადაცემა, რომელიც შეიცავს რუსეთის ფედერაციის მიერ საქართველოს ტერიტორიულ მთლიანობისა და კონსტიტუციური წყობის, ქვეყნის დამოუკიდებლობისა და სუვერენიტეტის დარღვევის ან/და ოკუპაციის ლეგიტიმაციის საფრთხეს.

„ნიუპოსტი“ საკანონმდებლო წინადადების შესაფასებლად საპარლამენტო უმრავლესობის ლიდერს არჩილ თალაკვაძეს დაუკავშირდა. როგორც „ქართული ოცნების“ ერთ-ერთი ლიდერი ჩვენთან საუბრისას აცხადებს, ის მზად არის მოისმინოს სამოქალაქო საზოგადოების ინიციატივები აღნიშნულ საკითხთან მიმართებით.

თალაკვაძე დასძენს, რომ საქართველოს მოსახლეობა ევროპასთან ინტეგრაციასა და საქართველოს ევროატლანტიკურ მისწრაფებას მყარად უჭერს მხარს:

„ანტისახელმწიფოებრივ პროპაგანდასთან და "რბილ ძალასთან" ბრძოლა ყველა ჩვენგანის საერთო ამოცანაა.

საქართველოს მოსახლეობა ევროპასთან ინტეგრაციას და საქართველოს ევროატლანტიკურ მისწრაფებას მყარად უჭერს მხარს, რაც საპარლამენტო არჩევნებმა დაადასტურა და საზოგადოებრივი აზრის კვლევებშიც ცალსახად ჩანს.

ჩვენ მზად ვართ სამოქალაქო საზოგადოების ინიციატივები ამ საკითხზე მოვისმინოთ და ერთიანობა ჩვენს ეროვნულ ინტერესებთან მიმართებაში შევინარჩუნოთ“, - აღნიშნა არჩილ თალაკვაძემ.

კანონპროექტი მიზნად ისახავს საკანონდებლო ხარვეზის გამოსწორებას, რომლის თანახმადაც არ იკრძალება რეკლამა თუ არ არსებობს ომისა და ძალადობის პირდაპირი მოწოდება. ხოლო საარჩევნო კოდექსით შემოწმებას ექვემდებარება მხოლოდ წინასაარჩევნო პროგრამა და არა აგიტაცია.

აღნიშნული ნორმის მიზანია რუსეთის მიერ გამოყენებული პირდაპირი და ირიბი გავლენის მეთოდების ნეიტრალიზება, რომლის მეშვეობითაც, რუსეთი ცდილობს შეცვალოს ქვეყნის განვითარების დასავლური კურსი და გავლენა მოახდინოს საქართველოში არსებულ პოლიტიკურ გარემოზე.