ოპოზიციურმა პარტიებმა „ევროპული საქართველომ“ და „თავისუფალმა დემოკრატებმა“ სახელმწიფო საკონსტიტუციო კომისია დატოვეს. ამის შესახებ განცხადება შალვა შავგულიძემ და ირაკლი აბესაძემ ჟურნალისტებთან გააკეთეს. მათი თქმით, განცხადება კომისიის დატოვების შესახებ კანცელარიას დღეს ჩაბარდება და შემდეგ საკონსტიტუციო კომისიას გადაეგზავნება.

„საარჩევნო სისტემასთან დაკავშირებით შემოთავაზებული ვარიანტი ემსახურება არა სამართლიანი სისტემის ჩამოყალიბების მიზანს, არამედ სრულიად უსამართლოდ, დაუმსახურებელ და მეტად დიდ უპირატესობას ანიჭებს სახელისუფლებო ძალას. საქართველოს პრეზიდენტის არჩევის წესთან და პრეზიდენტის უფლებამონიჭებებთან დაკავშირებით შემოთავაზებული ცვლილებები მიმართულია პრეზიდენტის ინსტიტუტის რეალური უფლებამოსილებებისაგან დაცლისა და მმართველი პოლიტიკური ძალის მიერ მასზე პოლიტიკური კონტროლის განზრახვას.ეს გვარწმუნებს, რომ კომისია „ქართულმა ოცნებამ“ შექმნა არაფართო კონსესუსის შედეგად შემუშავების მიზნით, არამედ იმისათვის რომ კომისიის გადაწყვეტილების სახელით შეეფუთა ის ცვლილებები, რომელთა განხორციელებაც წინასწარ ჰქონდა გადაწყვეტილი ვიწროპარტიული ინტერესებიდან გამომდინარე. ყოველივე აქედან გამომდინარე, და ასევე იმის გამო, რომ „ქართული ოცნების“ რიცხოვნობა კომისიაში დომინანტია, კანონპროექტის ხმის მიცემის პროცედურაში მონაწილეობის შემთხვევაში შესაძლებლობა არ გვექნება გავლენა მოვახდინოთ კენჭისყრის შედეგებზე. „ევროპული საქართველო“ და „თავისუფალი დემოკრატები“ ვტოვებთ კომისიას. პასუხისმგებლობა მთლიანად ეკისრება ამ კანონპროექტის ავტორს, ერთადერთ პოლიტიკურ ძალას „ქართულ ოცნებას“, - ნათქვამია განცხადებაში, რომელიც შალვა შავგულიძემ ჟურნალისტებს გააცნო.

მოძრაობა თავისუფლებისთვის-ევროპული საქართველოს წევრის ირაკლი აბესაძის თქმით „ქართულმა ოცნებამ" ყველაფერი გააკეთა, რომ კონსტიტუციით გარანტირებული იყოს მათი ვიწრო, ერთპარტიული მმართველობა და ოპოზიციურ პარტიებს მუდმივად გაურთულდეთ და ფაქტობრივად, შეუძლებელი გახდეს მათი ხელისუფლების შეცვლა:

,,პირველ რიგში, ვგულისხმობ საპარლამენტო არჩევნების სისტემას, როდესაც მანდატების გადანაწილების უსამართლო სისტემას გვთავაზობენ. არ ვეთანხმებით რა თქმა უნდა პრეზიდენტის უფლებამოსილებების ასე მნიშვნელოვნად შეკვეცას მისი, როგოც მთავარსარდლის ფუნქციების გაუარესებას და პრეზიდენტის პირდაპირი წესით არჩევის გაუქმებას,“ - განაცხადა ირაკლი აბესაძემ.

ფოტო- საზოგადოებრივი მაუწყებელი