"საბოტაჟი და პოლიტიკოსთა სპეკულაცია" - ვოლსკი ოპოზიციის მიერ საკონსტიტუციო კომისიის დატოვებაზე

პოლიტიკა - 12:25, 20 Apr, 2017

1294

საკონსტიტუციო კომისიის ოპოზიციის მიერ დატოვებას საპარლამენტო უმრავლესობაში პოლიტიკოსთა მხრიდან სპეკულაციებს უწოდებენ.

მმართველი ძალის წარმომადგენლები აღნიშნავენ, რომ იმ შემთხვევაში თუ ოპოზიცია ცვლილებების პაკეტის კენჭისყრაში მონაწილეობას არ მიიღებს, განხორციელებულ ცვლილებებზე პასუხისმგებლობას უმრავლესობა აიღებს.

„მე არ ვიცი თქვენ ვის შეფასებებს ეყრდნობით, აქ კიდევ ერთხელ უნდა ვთქვა, რომ მოვისმინე განცხადებები, რომ ზოგიერთი ოპოზიციის წარმომადგენელი აცხადებს, რომ ჩვენ პასუხისმგებლობას ვერ ავიღებთ ამ კონსტიტუციაზე. კიდევ ერთხელ მინდა ნათლად ვთქვა, რომ კონსტიტუციის ახალ პროექტზე და იმაზე, რასაც შევქმნით, რასაც დაამტკიცებს პარლამენტი, პასუხისმგებლობას ავიღებთ ჩვენ, ვინაიდან გვჯერა, რომ ეს არის გრძელვადიან განვითარებაზე, სტაბილური ქვეყნისთვის შექმნილი კონსტიტუცია,“-განაცხადა არჩილ თალაკვაძემ.

ოპოზიციის მიერ საკონსტიტუციო კომისიის დატოვებას "საბოტაჟს" უწოდებს ვიცე-სპიკერი გია ვოლსკი.

მე მაინც საბოტაჟს დავარქმევდი ამ კომისიაში მუშაობის შეწყვეტას, თუმცა 95% საკითხებისა შეთანხმებულია და გავლილია. რამდენიმე პრინციპული თემა არის დარჩენილი.

საპარლამენტო მმართველობა უფრო მეტად სტაბილურობის განმაპირობებელია ვიდრე საპრეზიდენტო, ერთ ადამიანის მმართველობა და ქვეყანას ეს კარგად არასდროს არ გამოდგომია,“-აცხადებს გია ვოლსკი.

ევროპული საქართველოს, თავისუფალი დემოკრატებისა და ლეიბორისტული პარტიის წარმომადგენლები საკონსტიტუციო კომისიას ოფიციალურად დღეს დატოვებენ.