,,აიკრძალება თამბაქოს რეკლამა ბილბორდებზე. დახურული უნდა იყოს სიგარეტის ,,ბოქსები“

,,აიკრძალება თამბაქოს რეკლამა ბილბორდებზე. დახურული უნდა იყოს სიგარეტის ,,ბოქსები“ - გუგული მაღრაძე

პოლიტიკა - 15:52, 18 Apr, 2017

3952

საქართველოს პარლამენტის ჯანდაცვის კომიტეტი თამბაქოს კონტროლის შესახებ კანონპროექტს განიხილავს. დეპუტატ გუგული მაღრაძის თქმით კანონპროექტის თანახმად შესაბამისი შეზღუდვები ეხება ელექტრონულ სიგარეტსაც, რადგან ის არანაკლებ მავნებელია ადამიანის ჯანმრთელობისთვის. მაღრაძის თქმით მოწევა უნდა აიკრძალოს ყველ დახურულ ადგილში, გარდა ფიზიკური პირის ოჯახისა.

ამასთანავე დეპუტატი სიგარეტის კოლოფზე დატანილი გაფრთხილების ზომებსაც შეეხო და აღნიშნა, რომ პიქტოგრამამ მთლიანი შეფუთვის 75% უნდა დაიკავოს. მაღრაძის განცხადებით იკრძალება თამბაქოს არაპირდაპირი წესით პროპაგანდაც, მისი თქმით არასწორია ის მოსაზრება რომ თამბაქოს რეკლამის შეზღუდვა სარეკლამო ბიზნესს დააზიანებს:

„ვკრძალავთ თამბაქოს არაპირდაპირი წესით პროპაგანდასაც, მაგალითად აქ შეიძლება იყოს ტკბილეული ან ისეთი სათამაშო, რომელიც თამბაქოს ნაწარმის იმიტაციას ახდენს. კანონის მიღების შემდეგ აიკრძალება თამბაქოს ნაწარმის, თამბაქოს აქსესუარების, თამბაქოს მოხმარებისთვის განკუთვნილი მოწყობილობების რეალიზაცია და განლაგება ღია რეკლამით. დახურული უნდა იყოს „ბოქსები“. ახლა გამოფენილი რომ არის ნაირ-ნაირი სიგარეტები, დახურული უნდა იყოს. აიკრძალება ასევე რეკლამა ბილბორდებზე. ხშირად ვითვლი ხოლმე 10 ბილბორდიდან რამდენზეა სიგარეტის რეკლამა, დაახლოებით 6-7-ზე არის სიგარეტის რეკლამა. იყო შენიშვნა მთავრობის მხრიდანაც, რომ ხომ არ დააზარალებს ეს სარეკლამო ბიზნესს. ამაზეც არსებობს კვლევები და აღმოჩნდა, რომ არანაირი ზიანი არ მიადგება. გვახსოვს გამოთქმა, რომ წმინდა ადგილი ცარიელი არ რჩება, ანუ ის ბილბორდები ცარიელი არ დარჩება, სხვა ტიპის რეკლამები წავა. ვაძლევთ დროს, რომ თამბაქოს ინდუსტრიაც შეეგუოს სიახლეებს. გარდა ამისა, სხვა ბიზნესის წარმომადგენლებმა იცოდნენ, რომ გათავისუფლდება ბევრი ბილბორდები, სადაც მათ შეეძლებათ რეკლამის განთავსება. იკრძალება თამბაქოს ნაწარმის ლატარიების და გათამაშებების მოწყობა, რაც ასევე რეკლამას წარმოადგენს. საჩუქრის გაცემა და ა.შ “ - განაცხადა გუგული მაღრაძემ.

მაღრაძის თქმით, კანონპროექტზე მუშაობისას განიხილეს, უნდა ჰქონდეთ თუ არა თამბაქოს ინდუსტრიის წარმომადგენლებს სპეციალური ვებგვერდი:

„ჩვენ ამაზე ვიმსჯელეთ და დავუშვით, რომ შეიძლება ჰქონდეს, მაგრამ არ უნდა იყოს ყველასთვის მისაწვდომი. მისაწვდომი შეიძლება იყოს მხოლოდ იმ ადამიანებისთვის, ვისაც ექნება პაროლი, შევა და მისი პროფესიონალური თუ სხვა ინტერესებიდან სურს გაიგოს, რა ხდება ამა თუ იმ თამბაქოს კომპანიაში“, - აღნიშნა გუგული მაღრაძემ.