საკონსტიტუციო კომისია ჯგუფების ფორმატში დღეს ბოლო სხდომას გამართავს

პოლიტიკა - 09:49, 18 Apr, 2017

1176

საკონსტიტუციო კომისია მუშაობას ასრულებს. კომისიის წევრები დღეს ბოლო სხდომას გამართავენ.

როგორც ცნობილია, უმრავლესობის მიერ მომზადებულ კონსტიტუციის სამუშაო ვარიანტს - კომისიაში შემავალ სხვა წევრებს დოკუმენტი კვირის ბოლოს წარედგინება.

პროცედურის მიხედვით, კომისია მას კენჭს უყრის, რის შემდეგაც მისი ჯერ პარლამენტში ინიცირება მოხდება, შემდეგ კი, საჯარო განხილვები დაიწყება.

“კვირის ბოლოს უკვე ყველა სამუშაო ჯგუფის შედეგი შეჯამდება, ვინც აცხადებს, რომ ახლა უნდა დატოვოს, ეს ნიშნავს, რომ დასრულების შემდეგ, როდესაც ყველა ვიშლებით, ყველა მიდის თავთავის საბრძოლო თუ სამუშაო სივრცეში. საუბარი იმაზე, რომ ვინმე დატოვებს და ამას აქვს ულტიმატუმის სახე, ეს არ არის რაციონალური,“ - განაცხადა პარლამენტის იურიდიულ საკითხთა კომიტეტის თავმჯდომარემ ეკა ბესელიამ.

სამუშაო ვერსიის გადაგზავნას ელოდებიან საკონსტიტუციო კომისიაში დარჩენილი ოპოზიცური პარტიებიც. მათი თქმით დოკუმენტის გაცნობის შემდეგ გადაწყვეტენ გადავლენ თუ არა ბოიკოტის რეჟიმზე.

„პარტიამ პროცენტულად პარლამენტში მიიღოს ადგილები იმდენი, რამდენ პროცენტსაც აიღებს არჩევნებში, ეს არის ერთი პრინციპული საკითხი, მეორე პრინციპული საკითხია, რომ ხალხს დარჩეს პრეზიდენტის არჩევის უფლება. ველოდებით წამოვა თუ არა ქართული ოცნება კომპრომისზე, ჯერჯერობით ისინი ჯიუტობენ,“ - აცხადებს პარლამენტის ფრაქცია მოძრაობა თავისუფლებისთვის - რეგიონების წევრი ზურაბ ჭიაბერაშვილი.

ნაციონალურ მოძრაობაში კი მიაჩნიათ, რომ დოკუმენტი მმართველი ძალის ინტერესებზეა მორგებული.

„იქ რეალურად არავის არ შეეძლო ამინდის შეცვლა. ქართული ოცნება წყვეტდა ყველაფერს. ამდენად მივიღეთ ცუდი დოკუმენტი, რომელიც იქნება მორგებული მმართველი ძალის ინტერესებზე,“ - განაცხადა ნიკა რურუამ.