მავთულხლართებთან მიტანილი წითელი კვერცხები და ოკუპირებული საფლავები ქართლში

პოლიტიკა - 12:19, 17 Apr, 2017

6633

უკვე მეცხრე აღდგომის დღესასწაულია რაც შიდა ქართლის მოსახლეობის ნაწილს, წინაპრების საფლავებზე გასვლის უფლება ეზღუდება. მიზეზი ცხინვალის დე ფაქტო მთავრობს და რუსეთის საოკუპაციო ძალების მიერ შექმნილი ხელოვნური ბარიერებია. ეკლიანი მავთულხლართები მაგალითად გორის მუნიციპალიტეტის რამდენიმე სოფელს ორ ნაწილად ყოფს და საძოვრებთან და მიწის ნაკვეთებთან ერთად ოკუპირებულ ტერიტორიაზეა მოქცეული საფლავებიც. სოფელ ფლავში ადგილობრივების ნაწილი, ნათესავებისთვის პატივის მიგებას და მათ საფლავზე წითელი კვერცხის მიტანას ვერ ახერხებს, ამიტომაც წითელი კვერცხები მავთულხლართებთან მიაქვთ, სადაც სანთელს ანთებენ და ტრადიციის გაგრძელებას ამ ფორმით ცდილობენ. იგევე პრობლემის წინაშე არიან სოფელ კოშკას და გუგუტიაანთკარის მცხოვრებლებიც, სადაც ხელოვნური ბარიერების აღმართვის შემდეგ საფლავების ნაწილი ოკუპირებულ ტერიტორიაზე მოექცა.

იმისთვის, რომ დევნილებს და საოკუპაციო ხაზთან მცხოვრებლებს, ოკუპირებულ ტერიტორიაზე მოქცეული, ნათესავების და წინაპრების საფლავებზე გასვლის შესაძლებლობა მისცემოდათ, ქართული მხარე საკითხს ერგნეთში ინციდენტების პრევენციისა და მათზე რეაგირების მექანიზმის ფარგლებში გამართულ შეხვედრებზე აყენებდა, თუმცა მხარეებს შორის შეთანხმება ვერ მოხერხდა.