18 აპრილს რუსეთის საგარეო საქმეთა მინისტრის სერგეი ლავროვის ვიზიტია დაგეგმილი სოხუმში, აღნიშნულს პროვოკაციად და ოკუპირებული რეგიონის ანექსიისკენ გადადგმულ ნაბიჯად აფასებენ სოხუმში.

„ევროპულ საქართველოში“ აცხადებენ, რომ პარლამენტმა უნდა მიიღოს რეზოლუციის ის პროექტი, რომელიც მათ წარადგინეს, რათა გამოხატოს საკუთარი მკვეთრი პოზიცია რუსული აგრესიის წინააღმდეგ:

„ყველაფერი არის გაგრძელება იმ პოლიტიკის, რაც რუსეთს გააჩნია და რომლის მიზანიც არის ამ რეგიონების ანექსია. შესაბამისად, ამ ანექსიას სჭირდება მნიშვნელოვანი საწინააღმდეგო ნაბიჯები ხელისუფლების მხრიდან. ძალიან სამწუხაროა, რომ ამ მოვლენების ფონზე, ხელისუფლება არ უჭერს მხარს ჩვენს რეზოლუციას, რომელიც სწორედ რუსეთის მიერ გადადგმული ნაბიჯების შესახებაა,“ - აცხადებს სერგი კაპანაძე.

ხელისუფლებას „ნაციონალურ მოძრაობაც“ აკრიტიკებს და მას უმოქმედობაში ადანაშაულებს:

„რუსეთი დგამს უფრო და უფრო აგრესიულ ნაბიჯებს საქართველოს სუვერენიტეტის წინააღმდეგ. ლავროვის ვიზიტი ოკუპირებულ ტერიტორიაზე არის ამის მკაფიო გამოხატულება,“ - აცხადებს ნუგზარ წიკლაური.

უმრავლესობაში კი აცხადებენ, რომ მათი მხრიდან ყველაფერი კეთდება, რომ საერთაშორისო თანამეგობრობა და პარტნიორები, საქმის კურსში იყვნენ რუსეთის პროვოკაციული ქმედებების შესახებ.

“რეზოლუცია ბევრი მივიღეთ პარლამენტის კედლებში ჩვენი სუვერენიტეტის დასაცავად და რუსეთის ქმედებების საწინააღმდეგოდ. კიდევ ერთხელ თუ საჭირო იქნება მივიღებთ. რაც შეეხება ოპოზიციის წუწუნს, რომ არიქა ჩვენი რეზოლუცია იბლოკება, არცერთი საკითხი ოპოზიციის არ დაბლოკილა,“ - განაცხადა ზვიად ძიძიგურმა.