სუს-ის ანგარიშს 3 კომიტეტის გაერთიანებულ სხდომაზე მოისმენენ

პოლიტიკა - 09:50, 13 Apr, 2017

1274

პარლამენტში დღეს სახელმწიფო უსაფრთხოების სამსახურის ანგარიშის მოსმენა იწყება. იურიდიულ საკითხთა, თავდაცვისა და უშიშროებისა და ადამიანის უფლებათა დაცვისა და სამოქალაქო ინტეგრაციის კომიტეტების გაერთიანებულ სხდომაზე ანგარიშით აქართველოს სახელმწიფო უსაფრთხოების სამსახური უფროსის მოადგილე ალექსანდრე ტაბატაძე წარსდგება. ანგარიშში მოყვანილი საკითხების გამო არ არის გამორიცხული სხდომა ნახევრად დახურულ რეჟიმში ჩატარდეს.

უმრავლესობას შეკითხვები უწყების მუშაობის სპეციფიკასთან დაკავშირებით ექნება.

„მნიშვნელოვანია მოვისმინო პასუხები ტერიტორიულ მთლიანობას მთლიანობასთან დაკავშირებულ საკითხებზე სახელმწიფო უსაფრთხოებას ამ ეტაპზე რა ინფორმაციები აქვს და რა შეუძლია რომ გვითხრას, იგივე ოკუპირებულ ტერიტორიებთან არსებულ მდგომარეობასთან და ჩვენი მოსახლეობის უსაფრთხოებასთან დაკავშირებით,“-განაცხადა გედევან ფოფხაძემ.

ოპოზიცია კი აქცენტს მოსმენების თემაზე გააკეთებს. მათი მტკიცებით, უსაფრთხოების სამსახური საქართველოში პოლიტიკურ იარაღად არის გადაქცეული.

„ნაცვლად იმისა, რომ ვმსჯელობდეთ რეალურად ანტიტერორისტულ კონტრდაზვერვით საქმიანობაზე, რომლითაც რეალურად უნდა იყოს დაკავებული უსაფრთხოების სამსახური, ჩვენ მოგვიწევს დავსვათ კითხვები იმ პოლიტიკურ დევნაზე, რომელშიც აქტიურად არის ჩართული სახელმწიფო უსაფრთხოების სამსახური და პირად ცხოვრებაში ჩარევის ფაქტებზე,“- განაცხადა ევროპული საქართველოს წევრმა ირაკლი აბესაძემ.