"ჩვენი მიზანია ევროკავშირის სრული წევრობა"- მიხეილ ჯანელიძე

პოლიტიკა - 21:07, 12 Apr, 2017

1274

ქ. ვარშავაში „ვიშეგრადის ოთხეულისა“ და „აღმოსავლეთ პარტნიორობის“ ქვეყნების საგარეო საქმეთა მინისტრების შეხვედრა გაიმართა, რომლის მიზანი იყო ევროკავშირსა და ,,აღმოსავლეთ პარტნიორობის'' ქვეყნებს შორის თანამშრომლობის შემდგომი განვითარების პერსპექტივებზე მსჯელობა და ამ პროცესში „ვიშეგრადის ოთხეულის'' ჩართულობა.

გაიმართა „ვიშეგრადის ოთხეულის“ საგარეო საქმეთა მინისტერიალი, სადაც მიღებულ იქნა ერთობლივი განცხადება. მინისტრების გადაწყვეტილების თანახმად 2017 წლის „აღმოსავლეთ პარტნიორობის“ ბრიუსელის სამიტის დეკლარაციაში უნდა აისახოს პარტნიორი ქვეყნების მისწრაფებების მხარდაჭერა და ევროპული პერსპექტივა.

„ვიშეგრადის ოთხეულის“ საგარეო საქმეთა მინისტრების შეხვედრის შემდგომ გაიმართა პლენარული სესია „აღმოსავლეთ პარტნიორობის“ ქვეყნებისა და სხვა მოწვეული მინისტების მონაწილეობით, რომელიც დაეთმო ევროკავშირსა და ,,აღმოსავლეთ პარტნიორობის'' ქვეყნებს შორის ურთიერთკავშირების განმტკიცების საკითხს, კერძოდ სატრანსპორტო ინფრასტრუქტურის და კომუნიკაციების განვითარების კუთხით. შეხვედრისას ხაზი გაესვა სტრატეგიული პროექტების განხორციელების და აღმოსავლეთ ევროპული პარტნიორი ქვეყნების პან-ევროპულ სატრანსპორტო ქსელში ინტეგრირების მნიშვნელობას.

„ვიშეგრადის ოთხეულის“ მინისტრებმა კიდევ ერთხელ დააფიქსირეს მტკიცე მხარდაჭერა „აღმოსავლეთ პარტნიორობისადმი“.

საქართველოს საგარეო საქმეთა მინისტრი მიხეილ ჯანელიძე პლენარული სესიის ფარგლებში სიტყვით გამოვიდა. მინისტრმა ისაუბრა „ვიშეგრადის ოთხეულის“, „აღმოსავლეთ პარტნიორობის“ მნიშვენლობაზე. მიხეილ ჯანელიძემ ასევე ისაუბრა საქართველოს მნიშვნელობაზე, როგორც ევროპა-აზიის დამაკავშირებელ კორიდორზე და ამ კუთხით სატრანსპორტო-ინფრასტრუქტურული პროექტების განხორციელების მნიშვნელობაზე. მიხეილ ჯანელიძემ ყურადღება გაამახვილა აღმოსავლეთ პარტნიორობის მომავალ სამიტზე, რომელიც დაგეგმილია ბრიუსელში 2017 წლის ნოემბერში. მინისტრმა კოლეგებს გააცნო ის მოლოდინები და პრიორიტეტები, რომელიც ქართულ მხარეს აქვს სამიტთან დაკავშირებით.

საგარეო უწყების ხელმძღვანელმა სიტყვით გამოსვლისას წარმოადგინა საქართველოს მთავრობის მიერ შემუშავებული ექვს პუნქტიანი გეგმა, რომლის განცორხიელებითაც საქართველო კიდევ უფრო დაუახლოვდება ევროკავშირს.

„ამ დღის წესრიგის შედეგად საქართველო გახდება ევროპული სახელმწიფო, წევრი ქვეყნის სტატუსის გარეშეც. ჩვენი მიზანია ევროკავშირის სრული წევრობა. ყველასათვის ცნობილია, რომ ეს წარმოადგენს საქართველოს მისწრაფებას. რეფორმები და ზემოთხსენებული ექვსი პუნქტი წარმოადგენს სრული წევრობის გზას. აღნიშნულ პროცესში დიდი მნიშვნელობა ენიჭება ევროკავშირის მხრიდან პოლიტიკურ გზავნილს - ევროპული პერსპექტივის დაფიქსირებას. ჩვენ განვაგრძობთ მუშაობას ამ მიმართულებით, რათა შევძლოთ ამ პოლიტიკური მისწრაფების განხორციელება“ - განაცხადა მიხეილ ჯანელიძემ.

საქართველოს საგარეო უწყების ხელმძღვანელმა კმაყოფილებით აღნიშნა, რომ „ვიშეგრადის ოთხეული“ განაგრძობს „აღმოსავლეთ პარტნიორობის“ ქვეყნების მისწრაფებების მხარდაჭერას. მინისტრი მიესალმა „ვიშეგრადის ქვეყნების“ საგარეო საქმეთა მინისტრების გადაწყვეტილებას, რომელიც დაფიქსირებულია 12 აპრილს გამართული „ვიშეგრადის ოთხეულის“ მინისტერიალის ერთობლივ განცხადებაში.

მიხეილ ჯანელიძემ ისაუბრა არსებული და მომავალში დაგეგმილი ინფრასტრუქტურული პროექტების შესახებ, რომლებიც მისი განცხადებით სარგებლობის მომტანი იქნება რეგიონისთვის და ევროკავშირისთვის.

„ვიშეგრადის ოთხეულისა“ და „აღმოსავლეთ პარტნიორობის“ ქვეყნების საგარეო საქმეთა მინისტრების შეხვედრაში ვიშეგრადის ოთხეულის, აღმოსავლეთ პარტნიორობის ქვეყნების, ბულგარეთის, ესტონეთის, რუმინეთის, სლოვენიის, შვედეთის, ხორვატიის საგარეო საქმეთა მინისტრები და ევროპული სამეზობლო პოლიტიკისა და გაფართოების მოლაპარაკებათა საკითხებში ევროკომისარი იოჰანეს ჰანი მონაწილეობდნენ.