"41:0"-დავით ნარმანია საკრებულოს ოპოზიციასთან გამართულ დებატებს აფასებს

პოლიტიკა - 10:02, 12 Apr, 2017

2395

დედქალაქის მერი მის მიერ საკრებულოში წარდგენილ წლიური ანგარიშს აფასებს. ნარმანია უმრავლესობისა და ოპოზიციის დაპირისპირებას ასე გამოეხმაურა: 41-ით 0.

დავით ნარმანიამ რუსთავი 2-ის საქმის განმხილველი მოსამართლის ნატალია ნაზღაიძის ოჯახისთვის მილიონი ლარის კომპენსაციის გაცემის საკითხზეც ისაუბრა.

მისი შეფასებით, კანონი არ დარღვეულა და მიწა არა ნაზღაიძეს არამედ დაზარალებულ ჩოხელს გადაეცა კანონის დაცვით. დავით ნარმანია არ გამორიცხავს, რომ თბლისის მერად ისევ იყაროს კენჭი თუ ამას მმართველი გუნდი გადაწყვეტს.

„რატომღაც ჩვენს ოპონენტებს არ უნდათ ამ სიკეთეების დანახვა, რაც ქალაქში ხორციელდება, ისინი ცდილობენ, რომ ისევ სიცრუით ისაუბრონ იმაზე, რომ თითქოს ძალიან ბევრი კითხვები დასვეს და ამ კითხვებზე პასუხი ვერ მიიღეს. მათი მხრიდან ერთ ყველაზე აქტუალური კითხვა რაც დაისვა ე.წ. ნაზღაიძის საქმეს ეხებოდა, თუმცა ეს არის რეალურად მოქალაქე ჩოხელის საქმე, რომელთან დაკავშირებითაც მე ძალიან კონკრეტული პასუხი გავეცი, რომ ჩვენ სტიქიით დაზარალებულ მოქალაქეს ამოვუდექით გვერდში. დღევანდელი პოლიტიკური თამაში ჩვენ მოვიგეთ 41:0,“-განაცხადა დავით ნარმანიამ.

ოპოზიციის შეფასებით კი სხდომაზე მმართველმა გუნდმა მოაწყო წარმოდგენა, რადგან მათ არ ქონდათ პასუხები ოპონენტთა კრიტიკულ კითხვებზე.

„ამას ერქვა ნარმანიას და უმრავლესობის მიერ ცუდად დადგმული სპექტაკლი. დასკვნითი სიტყვის საშუალებაც კი არ იყო. ამას საშუალება არ ერქვა იმიტომ, რომ მიდიოდა სინქრონში ლანძღვა-გინება. რაც შეეხება ნარმანიას მოხსენებას, ეს იყო ლამაზად გაფორმებული სლაიდშოუ. არაფრის მთქმელი და ლიტონი სიტყვა,“-აცხადებს მამუკა ახვლედიანი.