სურსათის ეროვნული სააგენტოს საკონტაქტო ინფორმაცია 4 მსხვილ სავაჭრო ქსელში გადახდის ქვითრებზე განთავსდება

პოლიტიკა - 19:31, 11 Apr, 2017

6012

სურსათის ეროვნული სააგენტოს ინიციატივით, საქართველოს მასშტაბით არსებული „ფუდმარტის“, „იოლის“, „სპარის“ და „ორი ნაბიჯის“ სავაჭრო ობიექტებში გადახდის ქვითრის უკანა მხარეს მითითებული იქნება სოფლის მეურნეობის სამინისტროს ერთიანი საინფორმაციო სამსახურის ცხელი ხაზის ნომერი - 15 01. მომხმარებელს, სურსათის შენახვისა და რეალიზაციის სტანდარტის დარღვევის აღმოჩენის შემთხვევაში, აღნიშნულ ნომერზე შეუძლია დარეკოს და შეტყობინება დატოვოს. აქცია ერთი თვის განმავლობაში გაგრძელდება და მიზნად მომხმარებლის ჩართულობის გაზრდას ისახავს.

„მომხმარებელთა ინტერესების დასაცავად, მნიშვნელოვანია სააგენტოს და კერძო სექტორის თანამშრომლობა. ამ მიზნით, რამდენიმე მსხვილი სავაჭრო ქსელის მონაწილეობით ვატარებთ აქციას, რომელიც მოსახლეობის ჩართულობას ითვალისწინებს. სურსათის შენახვისა და რეალიზაციის სტანდარტის დარღვევის აღმოჩენის შემთხვევაში, მომხმარებელს აქტიურობისკენ მოვუწოდებთ. არცერთი შეტყობინება არ დარჩება რეაგირების გარეშე,“ - განაცხადა სურსათის ეროვნული სააგენტოს უფროსმა ზურაბ ჩეკურაშვილმა.

მომხმარებელთა ინფორმირებულობისა და ჩართულობის გაზრდის კამპანიას სურსათის ეროვნული სააგენტო ევროკავშირის ინსტიტუციური განვითარების პროექტის (CIB) მხარდაჭერით ახორციელებს.