პარლამენტში საკომიტეტო ფორმატში სახალხო დამცველს უსმენენ, უჩა ნანუაშვილმა დეპუტატებს საქართველოში ადამიანის უფლებათა და თავისუფლებათა დაცვის მდგომარეობის შესახებ 2016 წლის ანგარიში წარუდგინა. ომბუდსმენის თქმით მის უწყებაში შარშან 8827 განცხადება-საჩივარი შევიდა. სახელმწიფო ორგანოების მხრიდან კი მისი რეკომენდაციების მხოლოდ ნაწილი იქნა გათვალისწინებული. უჩა ნანუაშვილმა იმ ხარვეზებზე ისაუბრა, რომელიც სასამართლო და სამართალდამცავ სისტემაშია. სახალხო დამცველის ანგარიშმა მმართველი გუნდის უკმაყოფილება გამოიწვია, მათი თქმით ომბუდსმენი გარკვეული საკითხების უმთავრესად კი სასამართლო სისტემის შეფასებისას არაობიექტურია და სასამართლო გადაწყვეტილებებს პოლიტიკურ ჭრილში განიხილავს და არ აფიქსირებს საკუთარ პოზიციას გარკვეული ძალების მხრიდან მოსამართლეების დისკრედიტაციასთან დაკავშირებით:

„თქვენმა, როგორ უჩა ნანუაშვილის სუბიექტურმა მხარემ, ხომ არ გადაწონა თქვენი, როგორც სახალხო დამცველის ობიექტური მხარე? სუბიექტურები ხართ თქვენ სასამართლოსთან მიმართებაში. ძალიან სამწუხაროა, რომ თქვენს თვალწინ ხოციელდება მოსამართლეთა ფართომასშტაბიანი, მიზანმიმართული დისკრედიტაცია, შეურაცხყოფა, ლანძღვა და მუქარა. თქვენ ამასთან დაკავშირებით თქვენი პოზიცია ხმამაღლა არასდროს დაგიფიქსირებიათ“- განაცხადა პარლამენტის იურიდიულ საკითხთა კომიტეტის თავმჯდომარის პირველმა მოადგილემ, ვანო ზარდიაშვილმა.

სახალხო დამცველი სასამართლოსთან დაკავშირებით გაკეთებული შეფასებების გამო გააკრიტიკა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველმა მოადგილემ , გედევან ფოფხაძემაც:

„მე მაინც მგონია რომ სახალხო დამცველს თავისი ინსტიტუციურ რესურსი პოლიტიკურ ჭრილში გადააქვს. რაც სწორი არ არის“- განაცხადა გედევან ფოფხაძემ.

დეპუტატების კრიტიკას უპასუხა უჩა ნანუაშვილმაც მისი თქმით, საჯარო მოხელეებს მათ შორის მოსამართლეებსაც აქვთ თმენის ვალდებულება და მას ამის შეხსენება დეპუტატებისთვის ტრიბუნიდან არ უნდა უწევდეს, რაც შეეხება სასამართლო გადაწყვეტილებების შეფასებას ნანუაშვილის თქმით ომბუდსმენის ოფისს სრული უფლება აქვს შეფასების გასაკეთებლად