მოძრაობა „არა ჩადებას“ საპარლამენტო ფრაქციებს საკანონმდებლო წინადადებით მიმართავს.

მოძრაობაში თვლიან, რომ პატრულის მსგავსად, ოპერატიულ ჯგუფსაც თან უნდა ჰქონდეს ე.წ. სამხრე კამერები, რომლითაც დაკავებიდან დაკითხვამდე პროცესი უწყვეტად დაფიქსირდება.

მოძრაობის მოთხოვნაზე კომენტარები კეთდება საკანონმდებლო ორგანოში.

უმრავლესობაში აცხადებენ, რომ კამერებით ყველა პოლიციელის უზრუნველყოფა ხარჯებთან არის დაკავშირებული.

„მე გამოვრიცხავ იმას, რომ ეს სისტემური პრობლემა არის, თუ სადმე რამე შემთხვევა იყო ასეთი, ამასაც, ბუნებრივია, ყურადღება უნდა მიექცეს,“ - აცხადებს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, სოფო კილაძე.

ოპოზიციის აზრით, ინიციატივის განხორციელება აუცილებელია, რათა ადამიანის უფლებები და პოლიციის რეპუტაცია დაცული იყოს.

„ყველა პოლიციელს, რომელიც გადის ოპერაციაზე, რომელიც ატარებს გადაუდებელ ან სასამართლო განჩინებით აღებულ ჩხრეკა-ამოღებას, ჰქონდეს კამერა, რომ გამოიციხოს ყველა სახის კითხვის ნიშანი და ხელის შევუწყოთ როგორც პოლიციის ავტორიტეტის ზრდას, ისე საზოგადოებაც დავიცვათ პოლიციელის მხრიდან უფლებამოსილების გადამეტებისგან,“ - პარლამენტის ფრაქცია ევროპული საქართველოს თავმჯდომარე, ოთარ კახიძე.

ნაციონალურ მოძრაობაში აღნიშნავენ, რომ ჩადების მეთოდი სისტემურ პრობლემას წარმოადგენს.

„ეს არის სისტემური პრობლემა და ცხადია, რომ სისტემური მიდგომა სჭირდება და თუ საკანონმდებლო დონეზე ამის უზრუნველყოფა მოხერხდება, მნიშვნელოვანი იქნება,“ - განაცხადა ნინო კალანდაძემ.