დაუნის სინდრომის მქონე 6 ბავშვის სიცოცხლეს საფრთხე ემუქრება - „დაუნის სინდრომის ასოციაცია“ მთავრობას მიმართავს

პოლიტიკა - 14:52, 10 Apr, 2017

1361

„საქართველოს დაუნის სინდრომის ასოციაცია" ჯანდაცვის მინისტრს, დავით სერგეენკოს, საქართველოს პრეზიდენტს, პრემიერ-მინისტრს, საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარესა და ადამიანის უფლებათა დაცვისა და ინტეგრაციის კომიტეტის თავმჯდომარეს განცხადებით მიმართავს.

"დაუნის სინდრომის ასოციაციის" წევრები სახალხო დამცველის ანგარიშს ეხმაურებიან იმასთან დაკავშირებით, რომ მინდობით აღზრდის მომსახურებაში მყოფი ბავშვები არასასურველ გარემოში იმყოფებიან და სახელმწიფო უწყების მხრიდან პრობლემის აღმოფხვრას ითხოვენ. „საქართველოს დაუნის სინდრომის ასოციაცია" საქართველოს მთავრობას მოუწოდებს დაუყონებლივ დეტალურად შეისწავლონ და გამოიძიონ საქმე; გამოძიების დასრულებამდე ბავშვები გამოიყვანონ მიმღები ოჯახიდან და განათავსონ უსაფრთხო და ჯანსაღ გარემოში, რადგან ასოციაციის წარმომადგენლების თქმით, ისინი არა მხოლოდ იმ მინიმალურ სერვისებს ვერ იღებენ, რომელსაც დღეს სთავაზობს სახელმწიფო, არამედ იმყოფებიან სიკვდილ-სიცოცხლის ზღვარზე; დადგეს ყველა იმ პასუხისმგებელი პირის საკითხი, ვისაც ჰქონდა ვალდებულება ამ ბავშვების მეურვეობა-მზრუნველობაზე წლების განმავლობაში. საქმიდან გამოკვეთილი სისტემური ხარვეზებიდან გამომდინარე, „დაუნის სინდრომის ასოციაცია“ მთავრობას მოუწოდებს:

შემუშავდეს ბავშვთა მიტოვების პრევენციის მექანიზმები და შეიქმნას ოჯახების გაძლიერების მომსახურებები.

გადაიხედოს შშმ პირის სტატუსის მინიჭების წესი. როდესაც დაბადებიდან სახეზეა ბავშვის მდგომარეობა და დამატებითი საჭიროებები, დროულად უნდა მოხდეს სისტემის მიერ ბავშვის იდენტიფიცირება და საჭირო ზომების მიღება.

განისაზღვროს ერთ მიმღებ ოჯახში რამდენი შშმ ბავშვის განთავსება არის მიზანშეწონილი და დაიგეგმოს ბავშვის განვითარებაზე ზრუნვის სტრატეგია.

სახელმწიფო ზრუნვის სისტემაში მყოფ ბავშვებს მიენიჭოთ პრიორიტეტი სახელმწიფო მომსახურებებით სარგებლობაში და მინდობით აღმზრდელებს შესრულების ვალდებულება.

შემუშავდეს ბავშვზე ზრუნვის პროგრამების სტანდარტები, მონიტორინგის ეფექტური მექანიზმები.

გაიზარდოს ადრეული განვითარების ქვეპროგრამის დაფინანსება, რათა საჭიროების მქონე ყველა ბავშვმა 0-7 წლამდე, შეძლოს ამ მომსახურებით სრულად სარგებლობა.

დაიგეგმოს პოლიტიკა 18 წლის ზემოთ, მიმღები ოჯახიდან სახელმწიფო ზრუნვიდან გასული ბენეფიციარების შემდგომი ცხოვრების ეტაპები, ზრდასრულთა საოჯახო ტიპის მომსახურების განვითარება, დამოუკიდებელი ცხოვრების ხელშეწყობა, დასაქმება და სხვა.