8 საფეხბურთო კლუბმა საქართველოს ჩემპიონატში მონაწილეობაზე უარი განაცხადა

სპორტი - 19:31, 05 Jun, 2013

1715

ეს გადაწყვეტილება "დინამო თბილისის", "ზესტაფონის", "ვიტ ჯორჯიას", "მეტალურგის", "სიონის", "ზუგდიდის", "მერანისა" და "ტორპედოს" წარმომადგენლებმა დღეს მიიღეს. უმაღლესი და პირველი ლიგის კლუბებისა და ფედერაციის ხელმძღვანელთა შეხვედრა სფფ-ში გაიმართა.
ჩემპიონატში მონაწილეობის საკითხს კლუბები მხოლოდ იმ შემთხვევაში განიხილავენ, თუ ისინი სახელმწიფოსგან 2-2 მილიონ ლარს მიიღებენ, როგორც ეს გორის "დილას" შემთხვევაში მოხდა.

Sportall.ge-ს ინფორმაციით, შეხვედრაზე გაჟღერდა იდეა, რომლის თანახმად, კერძო კლუბები ცალკე ჩემპიონატს ჩაატარებენ.

გამოცემა ასევე აქვეყნებს საფეხბურთო კლუბ "ზესტაფონის" პრესსამსახურის ხელმძღვანელის, სერგო ფუტკარაძის კომენტარს სფფ-ში გამართულ შეხვედრასა და კლუბში არსებულ მდგომარეობაზე.

"სასიამოვნოა, რომ კლუბები ერთ აზრამდე მივიდნენ. მთავარია სამართლიანი პოზიცია და იმ შეთხვევაში, თუ სახელმწიფომ თანაბრად არ დააფინანსა ჩემპიონატში მონაწილე კლუბები, 8 გუნდი ტურნირში მონაწილეობაზე უარს იტყვის.

მინდა მადლობა გადავუხადო ყველას თანადგომისთვის. შეიძლება ითქვას, შეხვედრით მორალურად კმაყოფილები დავრჩით, რადგან სამართლიანი პოზიცია დაფიქსირდა.

რაც შეეხება "ზესტაფონში" არსებულ მდგომარეობას, პერსონალის უმეტესი ნაწილი დათხოვნილია, რადგან მათ კონტრაქტები დაუსრულდათ. გაუცემელია ორი თვის ხელფასები, არ გვაქვს დენი.

პერსონალის მცირე ნაწილი, შეიძლება ითქვას, ენთუზიაზმის ხარჯზე მუშაობს და შეძლებისდაგვარად უვლის მოედანს. მზიანი ამინდების გამო ერთხელ სახანძროს გამოძახებაც კი დაგვჭირდა, რომ მოედანი მოგვერწყა.

ასევე, ძალიან გვეხმარებიან გუნდის გულშემატკივრები".