აქცია ენგურის ხიდზე - ოკუპანტების მიერ გატაცებული როგავების ოჯახი ხელისუფლებას მოქმედებისკენ მოუწოდბს

პოლიტიკა - 12:31, 08 Apr, 2017

2137

ამ წუთებში, ენგურის ხიდთან რუსი ოკუპანტების მიერ გატაცებული მამა-შვილი როგავების ოჯახის წევრები და ენმ-ის ზუგდიდის ორგანიზაციის წარმომადგენლები გამაფრთხილებელ აქციას მართავენ. ადგილზე იმყოფება საპატრულო პოლიციაც.

როგორც „ნიუპოსტის“ კორესპოდენტი იტყობინება, ისინი ოკუპანტების მიერ მამა-შვილის უკანონოდ დაპატიმრებას აპროტესტებენ და ხელისუფლებას მოქმედებისკენ მოუწოდებენ.

როგორც აქციაზე მყოფები აცხადებენ, საოკუპაციო ხაზთან საქართველოს მოქალაქეების დაკავებისას, მათზე ფიზიკური ზეწოლა ხორციელდება მხოლოდ იმიტომ, რომ ისინი ქართველები არიან.

შეგახსენებთ, 6 აპრილს , რუსმა ოკუპანტებმა, ტყაიადან მამა-შვილი როგავები იარაღის მუქარით გაიტაცეს. მოქალაქეები იმ დროს აიყვანეს, როდესაც ისინი მდინარე ენგურში დაკარგულ ცხენს ეძებდნენ.

გატაცებულები სავარაუდოდ, გალის ე.წ. იზოლატორში გადაიყვანეს.

როგავების ოჯახის განცხადებით, მათ გამოსასყიდისთვის თანხა არ გააჩნიათ და ხელისუფლებას დახმარებას სთხოვენ.

აქციაზე მყოფი მოსახლეობის განცხადებით, წინა ხელისუფლების დროს „ოკუპანტები საოკუპაციო ხაზთან მისვლას ვერ ბედავდნენ, ახლა კი ისე გათავხედნენ, რომ საქართველოს მოსახლეობას ე.წ. ხაზთან ახლოს სიარულსაც უშლიან.“

მათივე თქმით, სასოფლო-სამეურნეო სავარგულები საოკუპაციო ხაზთან აქვთ, თუმცა იქ სიარულსა და მოსავლის აღებას მათ ოკუპანტები არ აძლევენ. როგორც მოსახლეობა აცხადებს, ოკუპანტებს საქონელიც გაუტაცებიათ და მათივე თვალწინ მოუკლავთ.