აშშ საქართველოს ოკუპირებულ რეგიონებში უკანონო არჩევნებს და რეფერენდუმს გმობს

პოლიტიკა - 10:57, 08 Apr, 2017

1492

ამერიკის შეერთებული შტატების სახელმწიფო დეპარტამენტი საქართველო ოკუპირებულ ტერიტორიებზე ჩატარებულ და დაგეგმილ არჩევნებს განცხადებით ეხმაურება. აშშ მკაცრად გმობს არალეგიტიმურ არჩევნებს და საქართველოს ტერიტორიულ მთლიანობას და სუვერენიტეტს მხარდაჭერას კიდევ ერთხელ უცხადებს.

„ამერიკის შეერთებული შტატები გმობს გადაწყვეტილებას 9 აპრილს საკონსტიტუციო ცვლილებების შესახებ რეფერენდუმის გამართვის თაობაზე, რომელიც სამხრეთ ოსეთის სახელის ცვლილებას უკავშირდება, ამასთანავე ჩვენ ვგმობთ და არ ვაღიარებთ აფხაზეთში 12-26 მარტს ჩატარებული და სამხრეთ ოსეთში 9 აპრილს დაგეგმილი არალეგიტიმური არჩევნების შედეგებს.

ეს არალეგიტიმური არჩევნები და რეფერენდუმები საქართველოს ტერიტორიაზე ტარდება საქართველოს ხელისუფლების თანხმობის გარეშე. აშშ სრულად უჭერს მხარს საქართველოს ტერიტორიულ მთლიანობას და სუვერენიტეტს, საერთაშორისოდ აღიარებულ საზღვრებში. ჩვენი პოზიცია აფხაზეთთან და სამხრეთ ოსეთთან ნათელი და თანმიმდევრულია. ეს რეგიონები საქართველოს განუყოფელი ნაწილები არიან.“- აღნიშნულია სახელმწიფო დეპარტამენტის განცხადებაში.

შეგახსენებთ, 9 აპრილს ოკუპირებული ცხინვალის რეგიონში ე.წ. საპრეზიდენტო არჩევნები და ე.წ. სამხრეთ ოსეთისთვის სახელის გადარქმევის საკითხზე რეფერენდუმი ტარდება. არჩევნებსა და რეფერენდუმს უკანონოდ მიიჩნევენ როგორც საქართველოს ხელისუფლება, ისე საერთაშორისო ორგანიზაციები. აფხაზეთის დე-ფაქტო ხელისუფლებამ საქართველოს ოკუპირებულ ტერიტორიაზე ე.წ. საპარლამენტო არჩევნები 12 მარტს გამართა. 26 მარტს კი ე.წ. არჩევნების მეორე ტური ჩატარდა.