გოგიჩაიშვილი ოპონენტებს: "ივანიშვილმა 1-ელ ოქტომბერს შავი დღე გაგითენათ და ასე იქნება სულ"

პოლიტიკა - 17:58, 07 Apr, 2017

3260

ფრაქცია ”ქართული ოცნების” წევრმა ლევან გოგიჩაიშვილმა პარლამენტის ტრიბუნიდან ოპონენტების ბრალდებას უცნაურური რეპლიკით უპასუხა: "ბიძინა ივანიშვილმა 1-ელ ოქტომბერს შავი დღე გაგითენათ და ასე იქნება სულ".

”მინდა გამოვეხმაურო ჩვენი ოპონენტების გამოსვლებს. თითოეულ გამოსვლაში ძირითადი საკითხი ეხებოდა ერთ ადამიანს: ბიძინა ივანიშვილს. გვესმის, რომ ამ ადამიანმა 1-ელ ოქტომბერს გაგითენათ შავი დღე, რომელიც არ მთავრდება და არ დამთავრდება არასდროს ამ ქვეყანაში, რადგან ბიძინა ივანიშვილმა თავის გუნდთან და ქართველ ხალხთან ერთად გააჩინა მომავლის პერსპექტივა და ასე იქნება სულ. თქვენი შავი დღე არასდროს დამთავრდება. როდესაც ვიყურებით ოპოზიციის ფლანგზე, ჩვენ ყოველთვის გვახსენდება ის პრობლემები და რეალობა, რა რეალობაშიც ამ ადამიანებმა ეს ქვეყანა ჩააგდეს. რომ არა ეს ადამიანები, დღეს ამ ქვეყანაში იქნებოდა სხვა სიტუაცია, თბილისიდან 30 კილომეტრში არ იდგებოდნენ ტანკები, მრავალი დედა და მამა ამ ქვეყანაში იცხოვრებდა ბედნიერად, შეინარჩუნებდა კერძო საკუთრებას და დღეს საქართველო იქნებოდა უკეთეს სიტუაციაში, ვიდრე ვიმყოფებით” - განაცხადა ლევან გოგიჩაიშვილმა.

”გამოსვლა გამოსვლისთვის და კრიტიკა კრიტიკისთვის”- ამ რეპლიკით კი დეპუტატმა ქვეყნის პირველი პირის გამოსვლა შეაფასა.
მანამდე კი გოგიჩაიშვილმა პრეზიდენტ გიორგი მარგველაშვილის სხდომათა დარბაზიდან გასვლა გააპროტესტა.

პარლამენტში მიმდინარე დებატებისას, რამდენიმე წუთის განმავლობაში, პრეზიდენტი მარგველაშვილი სასესიო დარბაზში არ იმყოფებოდა.