ფრაქცია ქართული ოცნების წევრი ბექა ნაცვლიშვილი გიორგი მარგველაშვილის გამოსვლას აფასებს:

„ერთ რაღაცას გთხოვთ შემდეგისთვის ბატონო პრეზიდენტო, რომ იყოთ უფრო ჩვენი ქვეყნის საზოგადოების საჭიროებებზე ორიენტირებული და ასეთი დღის წესრიგი შემოგვთავაზოთ და ნაკლებად იყოთ ორიენტირებული, რაც თქვენი ვალდებულება პირიქითაა, რადგან თქვენ უნდა იყოთ წარმოქმნის შემთხვევაში პოლიტიკური კრიზისების განმუხტველი, სამწუხაროდ, ხშირად გვევლინებით როგორც პოლიტიკური კრიზისების შემქმნელი.

ჩვენ ადრე უფრო განებივრებულები ვიყავით პრეზიდენტის მიერ უფრო ემოციური, პროზაული გამოსვლებით, მაგრამ ამას სამწუხაროდ მოკლებულები აღმოვჩნდით. დღის წესრიგი, რომელიც პრეზიდენტმა შემოგვთავაზა გარკვეული თვალსაზრით მაგონებდა 90-იანების დღის წესრიგს, სადაც წამყვანი საზოგადოებრივი დისკურსი იყო დემოკრატიზაცია... კი მართალია დიდია სოციალური უთანასწორობა, მაგრამ განვითრების გარეშე მისი აღმოფხვრა წარმოუდგენელია, ჩვენ ძალიან რთული მემკვიდრეობა გვერგო,“- აღნიშნა ნაცვლიშვილმა.

უმრავლესობის წევრმა „ევროპელ დემოკრატების“ განცხადებებიც შეაფასა:

„ყოველთვის, როდესაც ჩვენი ოპონენტების გამოსვლას ვისმენ ხოლმე, ვაცნობიერებ ჩვენი ეპოქის მანკიერებას. ჩვენ ვცხოვრობთ პოსტმოდერნის ეპოქაში, სადაც ფაქტების გაყალბება, ფალსიფიცირება არის პოლიტიკური ცხოვრების ყოველდღიური შემადგენელი ნაწილი, სადაც ხდება ფაქტების განზოგადება, ფალსიფიკაცია და პოპულიზმი; სადაც არ არსებობს მორალური იმპერატივი და გულწრფელობა. განსაკუთრებით გამაკვირვა ამ თვალსაზრისით ჩვენი „ევროპელი დემოკრატების“ ნეოლიბერალურმა პოპულიზმმა, რომ თითქოს გადასახადების გაუქმებით და დერეგულაციით მოხდებოდა ქვეყნის ეკონომიკის სტიმულირება. თქვენ ხომ „ევროპელი დემოკრატები“ ბრძანდებით, ბატონებო?! ევროპა სწორედ რეგულაციებზე დგას. სწორედ ეს რეგულაციები და ამ რეგულაციების საფუძველზე ევროპაში მცხოვრები ადამიანების კეთილდღეობა, მათი დაცულობა გამოარჩევს ევროპას სხვა სახელმწიფოებისგან. აქედან გამომდინარე ეს თეორიული, ეკვილიბრიუმზე დაფუძნებული მსჯელობები გადასახადების შემცირებასთან დაკავშირებით თქვენგან განსაკუთრებით სასაცილოდ ჟღერს“, - განაცხადა ბექა ნაცვლიშვილმა.