"ქართული მართლმსაჯულება დუმს, როდესაც საქმე ეხება ხელისუფლებას"

"ქართული მართლმსაჯულება დუმს, როდესაც საქმე ეხება ხელისუფლებას" - კახიძე

პოლიტიკა - 16:20, 07 Apr, 2017

1106

ფრაქცია „ევროპული საქართველოს“ წევრმა ოთარ კახიძემ პარლამენტში პრეზიდენტის ყოველწლიური ანგარიშით გამოსვლის შემდეგ ქვეყანაში მართლმსაჯულების სფეროში განვითარებულ მოვლენებზე ისაუბრა.

“სტრასბურგის სასამართლომ დაადგინა ევროკონვენციის მეთვრამეტე მუხლის დარღვევა ივანე მერაბიშვილის საქმეზე და სტრასბურგის სასამართლომ მიუთითა, რომ მერაბიშვილის პატიმრობა ემსახურებოდა არალეგიტიმურ მიზანს და მერაბიშვილის პატიმრობას საფუძვლად ედო ხელისუფლების შეფარული დღის წესრიგი. ეს გადაწყვეტილება არის სტრასბურგის სასამართლოს ისტორიაში მეშვიდე, ხოლო საქართველოსთვის პირველი შემთხვევა, როდესაც დადგინდა ევროკონვენციის მეთვრამეტე მუხლის დარღვევა.

ბატონო პრეზიდენტო, თქვენი მოხსენების შემდგომ საბერძნეთის, საფრანგეთის და სხვა ევროპული ქვეყნების სასამართლოებს შეუერთდა ინგლისის სასამართლოც, რომელმაც ქართული მართლმსაჯულებისგან განსხვავებით დაინახა პოლიტიკური დევნის ნიშნები, ყოფილ მაღალჩინოსანთა საქმეებში

სამწუხაროდ ქართული მართლმსაჯულება დუმს, როდესაც საქმე ეხება ხელისუფლებას, როდესაც საქმე ეხება პოლიტიკურ კონიუნქტურას, ამას ეწირება კანონის უზენაესობა და სახელმწიფო ინსტიტუტების, კერძოდ პოლიციის, პროკურატურისადმი ნდობა,“ - აღნიშნა კახიძემ.

ოთარ კახიძეის თქმით, ძალადობის წახალისებამ და პოლიციის ინსტიტუტის დაკნინებამ გამიწვია 11-12 მარტს ბათუმში განვითარებული მოვლენები.

„გასული წელი მნიშვნელოვანი იყო იმ ერთადერთი ქმედითი სახელმწიფო ინსტიტუტის დაკნინების კუთხით, როგორიც იყო საქართველოს საკონსტიტუციო სასამართლო. სასამართლო, რომელიც რეალურად აბალანსებდა ხელისუფლებას და ზღუდავდა სახელმწიფო თვითნებობას“, - განაცხადა ოთარ კახიძემ და საკონსტიტუციო სასამართლოს მიერ მიღებული არა ერთ გადაწყვეტილებაზე ისაუბრა.

დეპუტატმა სტრასბურგის სასამართლოს მიერ „რუსთავი 2“-თან მიმართებაში გამოტანილ გადაწყვეტილებაზეც გაამახვილა ყურადღება.

„ხელისუფლებისთვის მნიშვნელოვანია არა სიღარიბის დაძლევა, არა უმუშევრობის შემცირება, ეკონომიკური წინსვლა, უსაფრთხოების დაცვა, არამედ ერთადერთი მიზანი, რაც მას ამოძრავებს, არის ივანიშვილის ძალაუფლების გახანგრძლივება. „ევროპული საქართველოს“ ამოცანა არის ქვეყნის წინსვლა, განვითარება, რასაც აუცილებლად გავაკეთებთ მაშინ, როდესაც მშვიდობიანად, კონსტიტუციის გზით შევცვლით თქვენს ხელისუფლებას“, - განაცხადა ოთარ კახიძემ.