საქართველოს პრეზიდენტმა გიორგი მარგველაშვილმა "კონსტიტუცია ყველასია" კამპანიის ფარგლებში, დღეს შეხვედრა ქუთაისში, აკაკი წერეთლის სახელობის სახელმწიფო უნივერსიტეტის სტუდენტებთან გამართა. სახელმწიფოს მეთაურმა ქვეყნის პირველი პრეზიდენტის ტრაგიკული გარდაცვალების გამოძიებასთან დაკავშირებით დასმულ შეკითხვას უპასუხა და განაცხადა, რომ ის მზადაა გამოძიებას მხარი დაუჭიროს. გიორგი მარგველაშვილმა საქართველოს პრეზიდენტების რთულ ბედზე იხუმრა:

„მაქსიმალურად მხარს დავუჭერდი გამოძიებას და ეს მნიშვნელოვანია სახელმწიფოსთვის, რომ ვიცოდეთ რა მოხდა პირველ პრეზიდენტთან მიმართებაში. მაგრამ საერთოდ ტრადიციაა ჩვენში, ცოტა მძიმეა პრეზიდენტებთან მიმართებაში: პირველი არის ტრაგიკულად მოკლული, მეორე სახლში გვყავდა გამოკეტილი და გარეთ არ ვუშვებდით, მესამე გაქცეული სხვა ქვეყანაში და არ ჩამოდის, მეოთხეს არ ვიცი, კონსტიტუციით გავურჩევთ საქმეს ადრე იქნება თუ გვიან.... პრეზიდენტების პროფკავშირების შექმნას ვფიქრობ, მათი უფლებების დაცვისთვის“- აღნიშნა გიორგი მარგველაშვილმა.