ბათუმის „მაგნოლიას“ საქმეზე დაკავებული გუკა რცეულიშვილი დღეს სასამართლო დარბაზიდან გირაოს სანაცვლოდ გაათავისუფლეს. რუსთავი 2-თან საუბრისას, რჩეულიშვილმა განაცხადა, რომ იგი დღეს გათავისუფლებას არ ელოდა, თუმცა იცოდა რომ რამდენიმე დღეში საპატიმრო დაწესებულებიდან გამოუშვებდნენ, რადგან მას წინასწარი პატიმრობის ვადა ეწურებოდა.

მისისვე თქმით, მათ აქვთ გარკვეული გეგმა, რომლის შესრულების გარანტიასაც პროკურატურას მისცემენ და ყველა დაზარალებული დაკმაყოფილდება:

„უნდა დავსხდეთ, მივიდეთ რაღაც გადაწყვეტილებამდე, რაც ყველასთვის მისაღები იქნება. დაკავებულები რომ არ იყვნენ მაია და რუსო, დაზარალებულები მაინც უნდა დაკმაყოფილდნენ, ეს ჩვენი მორალური ვალდებულებაა და ასევე ეკონომიკური, მაგრამ ყველა კონტრაქტს ხელს ორი მხარე აწერს, დარღვევები იყო ჩვენი მხრიდანაც და მათი მხრიდანაც, წარსულში ქექვა რომ დავიწყოთ, ისეთ ნიუანსებში ჩავალთ, რომელიც გაწელავს ამ პროცესს, რაც საჭირო არ არის, გვაქვს კონკრეტული გეგმა, პროკურატურას რამდენიმე კვირაში შევთავაზებთ გარანტიებს რომ ეს გეგმა შესრულდება, რითიც ყველა დაზარალებული დაკმაყოფილდება, მაგრამ ეს მოხდება, დედაჩემის და დეიდაჩემის გამოშვების პარალელურად, სხვა გამოსავალი უბრალოდ არ არსებობს“, - განაცხადა რჩეულიშვილმა.