გაჩეხილი ქალაქი და მომატებული ონკოლოგიური დაავადებები

გაჩეხილი ქალაქი და მომატებული ონკოლოგიური დაავადებები - ,,რისთვის შენდება ამდენი კორპუსი?!“

სოც.მედია - 12:55, 03 Apr, 2017

2883

„მოსახლეობა იხოცება უჟანგბადობით, უჰაერობით და მიკვირს, ვისთვის, ან რისთვის შენდება ამდენი კორპუსი?!“- კითხულობს კახი ლაზარიშვილი და ქალაქში მომრავლებულ მრავალსართულიანი შენობების თემას, შემდეგი პოსტით ეხმაურება.

ეს ვაკის სამკურნალო კომბინატის ყოფილი ტერიტორიაა, 6 წლის წინ აქ ჯერ ისევ იდგა გასული საუკუნის 30-ან წლებში აშენებული სამ სართულიანი სადა და მოკრძალებული შენობა, რომელიც დაშალეს და ეს ადგილი სხვა, უფრო უახლესი ტექნიკით აღჭურვილი, თანამედროვე სტანდარტების სამედიცინო ცენტრის მშენებლობისთვის გაასუფთავეს და გაამზადეს.
საბედნიეროდ, ძველი შენობის ნგრევისა და სამშენებლო მასალის ტერიტორიიდან გატანის დროს არ გაუჩეხავთ, არ ამოუძირკვავთ 70-80 წლის წინ დარგული მაღალი ტანის წიწვოვანი ხეები-ნაძვები, ფიჭვები და იმედია არც ახალი შენობის მშენებლობას შეეწირება ისინი...

უკანასკნელი 10-15 წელია ქალაქის ცენტრალურ უბნებში უმოწყალოდ ნადგურდება მრავალწლოვანი ხეები და მათ ადგილზე ახალი მრავალსართულიანი საცხოვრებელი კორპუსები შენდება! ამასობაში კი სულ უფრო ნადგურდება საცხოვრებლად ჯანსაღი გარემო, შხამისა და მომწამლავი ნივთიერებით დაბინძურებულ ქალაქში კი იმატებს მძიმე დაავადებებით დასნებოვნებული ადამიანების რიცხვი.
სპეციალისტები გვეუბნებიან, რომ ბავშვებში გახშირდა ფილტვისა და სისხლის ავთვისებიანი სიმსივნეები და მაშინ, როცა მწვანე საფარის მოჭრა-განადგურება გრძელდება, სამოქალაქო საზოგადოებასთან ერთად, მედიკოსებიც სულ უფრო აქტიურდებიან, ისინი კონკრეტულ და საგანგაშო განცხადებებს აკეთებენ იმის შესახებ, რომ გახშირდა ისეთი საშიში დაავადებები, რომლის მკურნალობა უმეტეს შემთხვევაში უშედეგოა.

რატომ ამაზე არავინ ფიქრობს, რატომ გვწამლავთ და გვხოცავთ ...?! დაუჯერეთ ქართველი მედიკოსების-ონკოლოგების, ჰემატოლოგების რჩევებს, შეისმინეთ მათი რეკომენდაციები და დაასრულეთ ამ ქალაქში მრავალწლოვანი და იშვიათი ჯიშის ხეების მოჭრა, მოსპობა, განადგურება და მათ ადგილზე უსახური, მრავალსართულიანი ბეტონის კორპუსების მშენებლობა!
გაუფრთხილდით საკუთარ მოსახლეობას, იზრუნეთ დემოგრაფიაზე! აკრძალეთ ქალაქის ცენტრალურ უბნებში მშენებლობები და გააუქმეთ ამჟამინდელი და წინა მთავრობების დროს გაცემული სამშენებლო ნებართვები! ეს თხოვნა კი არა, მოთხოვნაა!
გამოფხიზლდით და დაინახავთ ათასობით დაავადებულ ადამიანს, რომლებიც სისხლის დაავადებებით, ფილტვის სიმსივნით სიცოცხლის გადარჩენისთვის იბრძვიან ... მოსახლეობა იხოცება უჟანგბადობით, უჰაერობით და მიკვირს, ვისთვის, ან რისთვის შენდება ამდენი კორპუსი?!