ე.წ. მოსმენების კანონი - არასამთავრობო ორგანიზაციების პოზიციას იზიარებენ ოპოზიციის რიგებში. საპარლამენტო უმცირესობაში აცხადებენ, რომ კანონის არსებული ფორმით მიღება დაუშვებელი იყო, რადგან იგი საკონსტიტუციო სასამართლოს მანამდე მიღებულ გადაწყვეტილებას ეწინააღმდეგება:

„ევროპული საქართველოს წევრებიც იქნებიან მათ შორის, ვინც საკონსტიტუციო სასამართლოს მიმართავს იმისთვის, რომ ეს ანტიკონსტიტუციური კანონი მოსმენების შესახებ იქნეს შეჩერებული და პარლამენტმა ხელახლა განიხილოს და უკვე კონსტიტუციის, ადამიანის უფლებების დაცვით იქნას მიღებული კანონი,“ - განაცხადა ზურაბ ჭიაბერაშვილმა.

„ერთიანი ნაციონალური მოძრაობის“ რიგებში აცხადებენ, რომ ხელისუფლება აღნიშნული კანონით მოსახლეობისა და პოლიტიკური ოპონენტების გაკონტროლებას ცდილობს:

„საკონსტიტუციო სასამართლოს მიერ მიღებულ გადაწყვეტილებას ეწინააღმდეგება ის კანონი, რომელიც პარლამენტმა მიიღო და რომლის საწინააღმდეგოდაც შედის ახალი სარჩელი საკონსტიტუციო სასამართლოში. ეს კანონი, რომელზეც ჩვენ ვსაუბრობთ, პირდაპირ აძლევს ივანიშვილის ხელისუფლებას, სუს-ს, რომ ისე უთვალთვალოს, ისე მოუსმინოს და ისე მოიპაროს ინფორმაცია, რომ საერთოდ არავის არ შეეკითხოს,“ - აცხადებს პეტრე ცისკარიშვილი.