"ბიჭი ორსულ ქალს იცავდა" - რატომ დააკავეს თბილისის ცენტრში ახალგაზრდა მამაკაცი

"ბიჭი ორსულ ქალს იცავდა" - რატომ დააკავეს თბილისის ცენტრში ახალგაზრდა მამაკაცი - შსს-ს კომენტარი (ვიდეო)

შემთხვევა - 19:01, 31 Mar, 2017

73782

მოქალაქე გიორგი მაისა სოციალური ქსელის პირად გვერდზე ვიდეოს ავრცელებს, სადაც პოლიცია ახალგაზრდა მამაკაცს აკავებს.

ვიდეოს ავტორი აცხადებს, რომ "თვითმხილველების თქმით, დაკავებული ორსულ ქალს იმავე პატრულისგან იცავდა".
❝ის რომ ქალაქში ფეხით გადაადგილება შეუძლებელია და ანარქიაა და თითოეული ჩვენგანი ძალიან დიდი რისკის ქვეშ ვართ ყოველდღიურად სადაო საკითხი აღარაა, ამის იგნორირება ჩვენი მხრიდან კარგ შედეგებამდე არ მიგვიყვანს. დღეს დაახლოებით 13:00 სათზე, აბაშიძისა და ბერძენიშვილის ქუჩების კვეთაზე, ჩემი ყურადღება მიიბყრო ქალბატონის შეშფოთებულმა ტონმა და მისმა პროტესტის გამოხატვამ პატრულის მიმართ. საუბრიდან რამოდენიმე ფრაზა მომესმა რომელსაც ეს ქალბატონი შეშფოთებით გამოთქვამდა, რაც უკავშირდებოდა ეგრედწოდებულ ზებრაზე გადასვლას და იმას თუ როგორ შეშინდა იგი იმ ფაქტით რომ მას გზაზე გადასვლისას კინაღამ მანქანამ დაარტყა. იქვე ამ ქალს გვერდში ედგა ერთი ახალგაზრდა მამაკაცი, რომელიც მოგვიანებით აღმოჩნდა ამ ქალბატონს უბრალოდ თანადგომას უცხადებდა ცდილობდა შიგადაშიგ ერთი სიტყვა ჩაეკვეხებინა საუბარში რომელიც ინტენსიურად მიმდინარეობდა პატრულსა და აღნიშნულ ქალბატონს შორის. პატრულის თანამშრომლები კი თითქოს ამ ქალბატონის დაწყნარებისა და დაცვის ნაცვლად, რაღაცას უკიჟინებდნენ, საკმაოდ აგრესიული ტონით გამოირჩეოდნენ და მოუწოდებდნენ მას მიეღო შესაბამისი ზომები და გაესაჩივრებინა აღნიშნული ფაქტი და თითქოს ცდილობდნენ ამით მის თავიდან მოცილებას,ვიდრე მე შენელებული სვლით ქუჩის მოპირდაპირე მხარეს გვერდი ავუარე პატრულის მიერ ზებრაზე მიტოვებულ მანქანას და განვაგრძე ჩემი გზით სვლა, ამასობაში 3 დამატებითი პატრულის ეკიპაჟი ოპერატიულად შემოვარდა ქუჩის სხვადასხვა მხრიდან და მიცვივდნენ საკუთარ კოლეგებს დასახმარებლად. თავიდან დავიწყე იმ მანქანის ძებნა რომელიც პოტენციური დამნაშავე უნდა ყოფილიყო ამ სიტუაციაში თუმცა ამაოდ. ფაქტი გამაოგნებელია, მანქანა რომლის მოძრაობამაც ამ ქალის აღშფოთება და შიში გამოიწვია აღმოჩნდა თავად პატრულის. მოგვიანებით გავარკვიე იქვე მყოფი ადამიანებისგან, რომ ეს ქალი იყო ორსულად და ის ახალგაზრდა ბიჭი რომელიც მას იცავდა იყო უბრალო გამვლელი, რომელმაც ის ამ სიტუაციაში დაიცვა და ცდილობდა პატრულისთვის შეეხსენებინა ქალბატონის ფიზიკური მდგომარეობა. თუ რა მოყვა ამას ყველაფერს თავად შეგიძლიათ ვიდეო მასალაში იხილოთ"- წერს თვითმხილველი.

"ნიუპოსტი" საკითხის გარკვევას შინაგან საქმეთა სამინისტროში შეეცადა. უწყებაში აცხადებენ, რომ მოქალაქემ სამართალდამცავებს შეურაცხყოფა მიაყენა, რაც მათივე ინფორმაციით, შესაბამისი ფაქტებით დასტურდება.

შს სამინისტროს საზოგადოებასთან ურთიერთობის სამსახურის ცნობით, აბაშიძისა და ბერძენიშვილის ქუჩების კვეთაზე მომხდარ ფაქტზე სასამართლომ უკვე იმსჯელა და მოქალაქე ადმინისტრაციულ სამართალდამრღვევად ცნო.

რაც შეეხება დაკავებისას სამართალდამცავთა ქმედებას, უწყებაში განმარტავენ, რომ ფაქტზე მოკლვლევა შს სამინისტროს გენინსპექციამ დაიწყო.