ე.წ. ფარულ მოსმენა-მიყურადება - "ეს შენ გეხება" პრეზიდენტს, საზოგადოებას და პარტიებს მიმართავს

პოლიტიკა - 16:33, 31 Mar, 2017

1494

არასამთავრობო ორგანიზაციები ფარული საგამოძიებო მოქმედებების შესახებ დამტკიცებულ კანონს საკონსტიტუციო სასამართლოში გაასაჩივრებენ.

როგორც კამპანია “ეს შენ გეხება"-ში აცხადებენ დაგეგმილია საპროტესტო აქციების გამართვაც.

არასამღავრობო ორგანიზაციების თქმით, “ფარულ მოსმენა-მიყურადებასთან დაკავშირებული საკანონმდებლო პაკეტი საკონსტიტუციო სასამართლომ ერთხელ უკვე სცნო არაკონსტიტუციურად. თუმცა, საქართველოს პარლამენტმა არ გაითვალისწინა სასამართლოს შენიშვნები".

არასამთავრობო ორგანიზაციების განმარტებით, სარჩელის ელექტრონული ფორმა საქართველოს ყველა მოქალაქეს საშუალებას აძლევს ე.წ. მოსმენების კანონთან დაკავშირებით საკუთარი პოზიცია დააფიქსიროს.
მოქალაქეებს შეუძლიათ შევსებული სარჩელი ამობეჭდონ, ხელი მოაწერონ და მიაწოდონ 6 აპრილს, 12:00 სთ-დან 17:00 სთ-მდე, შემდეგ მისამართზე: ქ.თბილისი, ჭოველიძის 10, ფონდი „ღია საზოგადოება საქართველოს“ ოფისი. ასევე, შეუძლიათ უშუალოდ მივიდნენ დასახელებულ მისამართზე და შეავსონ სარჩელი. ამისთვის თან უნდა იქონიოთ პირადობის დამადასტურებელი მოწმობა ან პასპორტი.

„გვინდა მოვუწოდოთ ყველა პოლიტიკურ პარტიას, საქართველოს პრეზიდენტს, ნებისმიერ მოქალაქეს, არასამთავრობო ორგანიზაციას, შემოგვიერთდით, იმიტომ, რომ ეს არის თქვენი პირადი ცხოვრების დაცვის კარგი საშუალება,“- განაცხადა ფონდ ღია საზოგადოება - საქართველოს ადამიანის უფლებების პროგრამის მენეჯერმა, გიორგი ბურჯანაძემ.

ახალგაზრდა იურისტთა ასოციაციის საკონსტიტუციო სამართალწარმოების იურისტი, გიორგი გოცირიძე თვლის, რომ თუკი პრეზიდენტს მიაჩნია, რომ მოსმენების კანონი საკონსტიტუციო სასამართლოს გადაწყვეტილებას არ შეესაბამება, ლოგიკურია, რომ მან თავისი უფლებამოსილება გამოიყენოს და მიმართოს საკონსტიტუციო სასამართლოს.