"31 მარტი საქართველოს უახლოესი ისტორიის უმნიშვნელოვანესი თარიღია"- პრეზიდენტი

პოლიტიკა - 13:12, 31 Mar, 2017

1182

გიორგი მარგველაშვილმა 1991 წლის 31 მარტის რეფერენდუმის ჩატარებისა 26 წლისთავთან და ზვიად გამსახურდიას დაბადების დღესთან დაკავშირებით მიმართვა გაავრცელა:

„დღეს საქართველოს უახლოესი ისტორიის უმნიშვნელოვანეს თარიღს - დამოუკიდებლობის აღდგენის შესახებ ჩატარებული რეფერენდუმის დღეს აღვნიშნავთ. ჩვენი ქვეყნის ყველა მოქალაქეს ვულოცავ ამ დღეს.

გილოცავთ საქართველოს პირველი პრეზიდენტის, ზვიად გამსახურდიას დაბადების დღესაც, რომელსაც ასევე დღეს აღვნიშნავთ. მისი როლი განსაკუთრებულია დამოუკიდებლობის აღდგენისთვის ბრძოლაში. აქვე აღვნიშნავ, რომ ჩვენ სახელმწიფოს კვლავ აქვს პასუხისმგებლობა გამოიძიოს პირველი პრეზიდენტის გარდაცვალების გარემოებები.

1991 წლის 31 მარტის რეფერენდუმმა, რომელიც საქართველოს მთელ ტერიტორიაზე ჩატარდა, საერთაშორისო საზოგადოებისათვის თვალსაჩინო გახადა ჩვენი ხალხის, მათ შორის, აფხაზთა და ოსთა ურყევი ნება საქართველოს სახელმწიფოებრიობის აღდგენის შესახებ.

ჩვენ მკაფიოდ და ცალსახად განვაცხადეთ, რომ მიზნად ვისახავთ გავხდეთ თანამედროვე ევროპული სახელმწიფო, განვითარებული სამყაროს თავისუფალი და ღირსეული წევრი, მსოფლიო ერთა თანამეგობრობაში დავიმკვიდროთ ის ადგილი, რომელიც უძველესი და უნიკალური კულტურის ერს სამართლიანად გვეკუთვნის.

ამ დღიდან ურთულესი გზა განვვლეთ და ეს გზა გრძელდება დღესაც. ჩვენ მოვიპოვეთ დამოუკიდებლობა. მაგრამ თავისუფლებისათვის შრომა და ბრძოლა გრძელდება. ჩვენ გვაქვს პასუხისმგებლობა, შევქმნათ არა მხოლოდ პოლიტიკურად დამოუკიდებელი, არამედ ასევე პოლიტიკურად თავისუფალი სახელმწიფო. მხოლოდ თავისუფლება გააერთიანებს ჩვენ მიწასაც და ადამიანებსაც, შექმნის პირობებს აქ მცხოვრები ყველა ხალხის მშვიდობიანი და ჰარმონიული თანაცხოვრებისა და განვითარებისთვის.

ამგვარი თავისუფლების წინაპირობა კვლავ დამოუკიდებლობის გარიჟრაზე გამოხატული ქართველი ხალხის ნების - დასავლური განვითარების გზის ერთგულებაა.“- აღნიშნულია პრეზიდენტის მიმართვაში.