სტუდენტთა ჩართულობის პრინციპი უმაღლესი სასწავლებლების მართვის ორგანოებში იცვლება. აღნიშნულს უმაღლესი განათლების შესახებ კანონში შესატანი ცვლილებები ითვალისწინებს. ცვლილებებს დღეს საქართველოს პარლამენტის განათლების კომიტეტში განიხილავენ.

სტუდენტებს საშუალება ექნებათ მონაწილეობა მიიღონ, როგორც უმაღლესი საგანმანათლებლო დაწესებულებების წარმომადგენლობითი საბჭოს - სენატის, ასევე ძირითადი საგანმანათლებლო ერთეულის, ფაკულტატური საბჭოს საქმიანობაში.

„სტუდენტური თვითმმართველობების გაუქმება არ ხდება, უბრალოდ ხდება სტუდენტური ორგანიზაციების გაჯანსაღება, რომ სტუდენტების უფლებებზე იყოს რეალურად ორიენტირებული. თანაბარ უფლებას, რომ იყვნენ არჩეული უნივერსიტეტის მმართველობის ორგანოებში, კერძოდ ფაკულტატურ საბჭოებში,“ - განაცხადა მარიამ ჯაშმა.