ე.წ. მოსმენების კანონი - საპარლამენტო ოპოზიცია ე.წ. მოსმენების კანონის გასაჩივრებისთვის ემზადება

პოლიტიკა - 12:58, 30 Mar, 2017

1197

საპარლამენტო ოპოზიცია ე.წ. მოსმენების შესახებ კანონის გასაჩივრებას ოპერატიულ-ტექნიკური სააგენტოს ამოქმედებამდე როგორც საკონსტიტუციო, ასევე ადამიანის უფლებათა დაცვის ევროპულ სასამართლოში გაასაჩივრეას გეგმავს.

„საქართველოს ხელისუფლების ისტორიაში ერთ შავი ლაქა დაემატა, რომელიც არის ტოტალური მოსმენის სისტემის დამკვიდრება, რომლის მთავარი მიზანია გააკონტროლოს საზოგადოება, აქტიური არასამთავრობო ორგანიზაციები, პოლიტიკური ოპონენტები, რაც საბოლოო ჯამში ემსახურება ხელისუფლების შენარჩუნებას და ქვეყანაში ავტორიტარული ტენდენციების გაღრმავებას. ეს არის არაკონსტიტუციური,“-განაცხადა ენმ-ს ერთ-ერთმა ლიდერმა რომან გოცირიძემ.

ევროპული საქართველოს წევრები მიიჩნევენ, რომ ხელისუფლებამ მიიღო კანონი, რომელმაც სახელმწიფო უსაფრთხოების სამსახურს უფლებები გაუფართოვა და ქვეყანაში უკანონო მოსმენები დააკანონა.

„ამით პირველ რიგში არ შესრულდა საკონსტიტუციო სასამართლოს გადაწყვეტილება. ევროპულ საქართველოს აქვს კონსულტაციები როგორც არასამთავრობო სექტორთან, ასევე პოლიტიკურ პარტიებთან და ვაპირებთ, რომ ეს კანონი გავასაჩივროთ საკონსტიტუციო სასამართლოში,“-აცხადებს გიორგი ტუღუში.

საკითხზე კომენტარი გააკეთა პატრიოტთა ალიანსის ლიდერმა. ირმა ინაშვილი განმარტა, მათ არ დაუჭირეს მხარი კანონს.

დღეიდან ფარულ მოსმენა-მიყურადებასთან დაკავშირებული კანონი ამოქმედდება. 3 თვის განმავლობაში კი შეიქმნება ოპერატიულ-ტექნიკური სააგენტო. სააგენტოს უფროსი ამ პერიოდში შეიქმნება. განკარგულებას როგორც მის დანიშვნაზე, ისე მის გათავისუფლებასთან დაკავშირებით პრემიერი გასცემს. სააგენტოს უფროსისი დანიშვნამდე მის კანდიდატურას, სპეციალური კომისია შეარჩევს. თავის მხრივ, კომისიას არჩევანის გაკეთება იმ სამ კანდიდატს შორის მოუწევს, რომელსაც სუს-ის ხელმძღვანელი შეარჩევს.