ევროპის საბჭოს საპარლამენტო ასამბლეის წარმომადგენლები დღეს საპარლამენტო ფრაქციებს შეხვდებიან, შეხვედრაზე ერთ-ერთი მთავარი თემა საარჩევნო სისტემაში მანდატების გადანაწილების საკითხი იქნება.დღესვე ევროპის საბჭოს მონიტორინგის კომიტეტის დელეგაცია შეხვდება ქვეყნის პრემიერსა და საგარეო საქმეთა მინისტრს.

„ავუხსნით რომ ეს ერთგვარი გამჭვირვალე პროცესი რეალურად არ არის გამჭვირვალე. უმრავლესობა არ ლაპარაკობს რომელი საკითხი როგორ უნდა გადაწყდეს და უკვე 10 აპრილს აპირებენ ინიცირებას პარლამენტში. ეს არის ფსევდო გამჭვირვალობა, რომელიც ამ ქვეყანას არ წაადგება,“-აცხადებს თამარ კორძაია.

მედია პლურალიზმსა და სასამართლო სისტემაში არსებულ ხარვეზებზე გაამახვილებს ყურადღებას ევროპული საქართველო.

„ქვეყანაში მედია პლურალიზმის შენარჩუნების აუცილებლობას, რაც უკავშირდება პირველ რიგში რუსთავი 2-თან, თუმცა არა მარტო, ასევე სხვა ტელეკომპანიებთან დაკავშირებულ საკითხები. ბუნებრივია ქვეყანაში, სადაც პოლიტიკური პატიმრები ეს ძალიან მწვავე საკითხია და მდგომარეობა რაც არის სასამართლოსთან დაკავშირებით პოლიტიზირებულია და გვესმის ის, რომ კორუფციაში ჩაერთო სასამართლო, ეს საკითხები იქნება განხილული,“-განაცხადა ზურაბ ჭიაბერაშვილმა.

ენმ საქართველოში ადამიანის უფლებების კუთხით არსებულ ხარვეზებზე ისაუბრებს:

„ვისაუბრებთ ყველა იმ პრობლემაზე, რომელიც დაკავშირებულია ადამიანის უფლებების დარღვევასთან ქვეყანაში. მათ შორის მოსმენებთან დაკავშირებით და ყველა იმ კანონზე, რომელიც მიიღო ხელისუფლებამ ყველა ფუნდამენტური პრინციპის დარღვევით,“-აცხადებს აკაკი მინაშვილი.